маориф
РУШДИ МАОРИФ ДАР МАҲАЛ
- Мақомоти иҷроияи маҳаллии ҳокимияти давлатии ноҳияи Темурмалик баҳри дар амал татбиқ намудани сиёсати маорифпарваронаи роҳбарияти олии мамлакат таваҷҷуҳи хосса зоҳир намуда, дастовард ва ислоҳи камбудиҳои соҳаро таҳти назорати қатъӣ қарор додаанд. Барои дастёбӣ ба мақомҳои аз ин ҳам баландтар моро зарур аст, ки сатҳу сифати таълимро дар ҳама зинаҳо беҳтар намоем, барои таҳсилоти босифат заминаҳои моддиву техникии муассисаҳои таълимиро таҳким бахшем ва самарабахшии фаъолияти онҳоро таъмин намоем,- гуфт мудири шуъбаи маорифи ноҳия Ш. Сатторов.
Ҳоло дар 51 муассисаи таълимии ноҳия 13 ҳазору 817 хонанда таълим мегирад. Ба кори таълиму тарбия дар муассисаҳои таълимии ноҳия 975 омӯзгор вобаста мебошад. Соли гузашта бо роҳхати Вазорати маориф ва илми Ҷумҳурии Тоҷикистон 45 омӯзгори ҷавон омада, бо ҷои кори доимӣ таъмин гардиданд. Ҳоло 71 нафар тариқи инфиродӣ дар донишгоҳҳои давлатҳои хориҷӣ таҳсил карда истодаанд. Ҳамзамон, 18 нафар хатмкунанда бо Квотаи президентӣ, аз ҷумла бо дастури Пешвои миллат 7 нафар ятими кулл ба муассисаҳои таҳсилоти олии кишвар дохил шудаанд.
Бояд гуфт, ки дар зарфи 27 - соли Истиқлолияти давлатии Ҷумҳурии Тоҷикистон дар ноҳияи Темурмалик сохта ба истифода додани 18 муассисаи таълимии хуштарҳу замонавӣ, муҷаҳҳаз бо таҷҳизоти муосир ва фарогирии 157 синфхона барои 3918 ҷои нишаст ва ба маблағи 15 миллиону 187 ҳазор сомонӣ мавриди баҳрабардорӣ қарор гирифт. Ҳамзамон, сохтмони хобгоҳ барои тарбиятгирандагони мактаб - интернати кӯдакони ятиму бепарастори Танобчӣ, гимназия барои хонандагони болаёқат ва интернати Кангурт барои 457 ҷои хоб ба маблағи 3 миллиону 582 ҳазор сомонӣ сохта ба истифода дода шуд.
- То Ҷашни 30-солагии Истиқлолияти давлатии Ҷумҳурии Тоҷикистон боз 4 муассисаи таълимии нав ва 15 синфхонаи иловагӣ дар назди муассисаҳои таълимӣ аз ҳисоби Фонди Саудии Рушд бунёд мегардад. Барои баланд бардоштани сифати таълиму тарбия моро зарур аст, ки дар тамоми зинаҳои таҳсилот мутахассисони ба талаботи замони муосир ҷавобгӯйро тарбия намуда, онҳоро ҳамчун насли ояндасози миллат ба воя расонем, - гуфт Шамсулло Сатторов.
Холназар КАСИРОВ, «Ҷумҳурият»
Баёни ақида (0) Санаи нашр: 29.01.2019 №: 21-22 Мутолиа карданд: 1179
