фарҳанг
ФАРҲАНГИ МИЛЛӢ. МУАРРИФИИ ОН БОЯД ДАР САТҲИ ШОИСТА СУРАТ БИГИРАД
Тӯли асрҳо донишмандону муҳаққиқон ва аҳли адаби тоҷик шоҳкориҳои зиёде офаридаанд, ки онҳо дар шинохти таъриху фарҳанги миллатамон нақши барҷаста доранд. Аксари онҳо дар осорхонаҳо маҳфуз буда, ба маърази тамошо гузошта шудаанд.
Саҳми Осорхонаи миллии Тоҷикистон дар муаррифии таърих, фарҳанг, ҳунарҳои мардумӣ, тарғиби дастовардҳои даврони истиқлолият ва ҷалби бештари сайёҳон назаррас мебошад. Ҳамарӯза шумораи зиёди тамошогарон аз толорҳои намоишии Осорхонаи миллӣ дидан менамоянд. Дар баробари сокинони пойтахт ва шаҳрвандони кишвари азизамон миёни онҳо сайёҳону меҳмонони хориҷиро низ дидан мумкин аст.
Давоми соли 2018 - 115861 нафар тамошогари дохилӣ ва хориҷӣ аз экспозитсияҳои осорхона боздид намуданд, ки ба 11402 нафари онҳо аз ҷониби роҳбаладон ва кормандони илмии осорхона 1697 экскурсия гузаронда шуд. Шумораи ташрифи сайёҳон ва меҳмонони хориҷӣ ба Осорхонаи миллӣ дар соли гузашта 4502 нафарро ташкил дод, ки нисбат ба соли 2017 - 1261 нафар зиёд мебошад.
Бар асоси таҳлили оморӣ дар давоми соли сипаришуда намояндагони беш аз 52 кишварҳои мухталифи олам аз экспозитсияҳои мо боздид намуданд. Аз зумраи онҳо намояндагони ИМА, Канада, Бразилия, Британияи Кабир, Фаронса, Олмон, Швейтсария, Ҳолланд, кишварҳои назди Балтика, Миср, Мозамбик, Амороти Муттаҳидаи Араб, Арабистони Саудӣ, кишварҳои Осиёи Марказӣ, Россия, Ҳиндустон, Чин, Корея, Ҷопон, Индонезия, Филиппин ва Австралия мебошанд.
Аз ҷониби ходимони илмии осорхона беш аз 100 гузоришҳои телевизионӣ ва радиоӣ пахш гардида, 55 мақолаи илмӣ - оммавӣ дар рӯзномаю маҷаллаҳо нашр шудаанд.
Маврид ба зикр аст, ки ҳар як инсони соҳибфарҳанг бояд аз таърихи халқу сарзамини хеш огаҳии амиқу дақиқ дошта бошад. Зеро таърих пайвандгари дирӯзу имрӯз ва оянда буда, роҳро ба сӯи фардо равшан менамояд.
Фаридун КЕНҶАЕВ, сардори шуъбаи экскурсионӣ
ва оммавии Осорхонаи миллии Тоҷикистон
Баёни ақида (0) Санаи нашр: 29.01.2019 №: 21-22 Мутолиа карданд: 1257
