фарҳанг
ҲУНАР ДАР МАДДИ АВВАЛ
Ба ҳамагон маълум аст, ки шавқу рағбати кӯдак ба омӯзиши касбу ҳунар ҳанӯз аз хурдсолӣ, хусусан дар муассисаҳои томактабӣ, оғоз меёбад. Сипас, онро таҳким мебахшанд ва шогирдонро ба роҳи дурусти интихоби касб роҳнамоӣ менамоянд.
Дар муассисаҳои таълимӣ омилҳои мухталиф ба интихоби дурусти касбу ҳунар ва баланд бардоштани шавқи хонандагон таъсир мерасонанд. Яке аз онҳо дарси «Технологияи касбу ҳунар» мебошад, ки аз синфи 5 оғоз меёбад. Барои ташаккули дурусти шавқу завқи шогирдон омӯзгори технологияи касбу ҳунар нақши муҳим дорад. Омӯзгор бояд худ дониши мукаммал ва ҳунари воло дошта бошад. Ҳамзамон, вай бояд фаъолияти худро бо назардошти асосҳои равоншиносӣ (психологӣ) ба роҳ монад, зеро тафаккури хонандагон аз ҳамдигар тафовут доранд. Барои ноил шудан ба натиҷаҳои дилхоҳ бояд маърифати ҳунаромӯзии шогирдонро зина ба зина сайқал диҳад.
Дар ин раванд, дуруст интихоб намудани касб хеле зарур аст. Дуюм ба назар бояд гирифт, ки аз рӯи ихтисос кор ёфтан мумкин аст, ё не. Сеюм, касб бояд ба имкониятҳои фард мувофиқ бошад.
Падару модарон, омӯзгорон, мураббиён ва аҳли ҷомеаро зарур аст, ки ба интихоби касби ояндаи насли наврас бо назардошт ва ба ҳисобгирии бозори меҳнат омодагӣ бинанд. Дар муассисаҳои мо барои омӯзиши касбу ҳунар духтарон кабинетҳои алоҳида доранд, ки бо таҷҳизоти махсус, аз қабили мошинаҳои дарздӯзӣ, манқалҳои барқӣ ва дигар маснуоти дӯзандагию пазандагӣ ҷиҳозонда шудааст. Ба хонандагон омӯзгорони варзида, ки мутахассиси соҳа ҳастанд, касбу ҳунар меомӯзанд.
Аз қадим халқу миллати тамаддунофари мо бо ҳунармандӣ ва соҳибмаърифатиашон аҳли оламро ба ҳайрат гузошта, яке аз миллатҳои эҷодкор ва ҳунарманд шинохта шудаанд. Касбҳои заргарӣ, кулолӣ, оҳангарӣ, кандакорӣ дар рӯйи чӯб, меъморӣ, бофандагӣ, дӯзандагӣ, пазандагӣ ва ғайраҳо асрҳои аср боқӣ ва аз наслҳо ба наслҳо мерос монда, то имрӯз омада расидаанд. Онҳо рӯз то рӯз рушд ёфта, дар тарбияи меҳнатдӯстии хонандагон ва наврасон нақши босазо мегузоранд. Пешвои миллат муҳтарам Эмомалӣ Раҳмон дар Паёми навбатии худ солҳои 2019-2021 - ро Солҳои рушди деҳот, сайёҳӣ ва ҳунарҳои мардумӣ эълон намуданд. Моро зарур аст, ки ба ғамхориҳои Сарвари давлат ҷавоби дуруст дода, касбомӯзии ҷавонону наврасонро таҳким бахшем.
Майсара АҲРОРОВА,
омӯзгори МТМУ № 56 - и ноҳияи Синои шаҳри Душанбе
Баёни ақида (0) Санаи нашр: 30.01.2019 №: 23 Мутолиа карданд: 1202
