иқтисод
БМТ. БАРРАСИИ НАТИҶАҲОИ СОЛОНА
Дар ҷаласаи васеи Бонки миллии Тоҷикистон ва ташкилотҳои қарзии мамлакат натиҷаҳои фаъолияти низоми бонкӣ дар соли 2018 баррасӣ ва вазифаҳо барои соли 2019 муайян гардиданд.
Раиси БМТ Ҷамшед Нурмаҳмадзода зимни ифтитоҳи ҷаласа иброз дошт, ки Бонки миллии Тоҷикистон ҷиҳати амалисозии дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, қонунгузории кишвар ва қарорҳои Ҳукумати мамлакат дар самти солимгардонии низоми бонкӣ ва тақвияти назорат, таъмини суботи молиявӣ, татбиқи сиёсати самараноки пулию қарзӣ ва мусоидат ба рушди устувори иқтисодӣ тадбирҳои саривақтӣ ва чораҳои таъхирнопазир меандешад. Нишондиҳандаҳои мусбати макроиқтисодӣ, рушди воқеии иқтисодию иҷтимоӣ ва афзоиши ҳаҷми маҷмӯи маҳсулоти дохилӣ аз ин шаҳодат медиҳанд.
Таваррум дар сатҳи муътадил нигоҳ дошта шуд. Ҳамкорӣ бо мақомоти дахлдор ва институтҳои молиявии ҷаҳонӣ ҷиҳати амалисозии сиёсати пулию қарзӣ ва тезондани раванди ислоҳоти соҳаи бонкдорӣ, ки ҳадаф аз онҳо таҳкими рушди босуботи иқтисодию иҷтимоии кишвар аст, густариш ёфт.
Нурмуҳаммад Шарифзода, директори департаменти назорати бонкӣ оид ба вазъи низоми бонкӣ, дастоварду камбудиҳо ва тадбирҳои роҳандозишуда ҷиҳати пешгирии хавфҳои эҳтимолӣ гузориш дод. Сипас, раванди иҷрои дастуру супоришҳои Сарвари давлат муҳтарам Эмомалӣ Раҳмон дар самти босамар амалӣ намудани сиёсати пулию қарзӣ, таҷдиди сиёсати фоизӣ, ҷалби сармояи дохилию хориҷӣ, соҳиб шудан ба эътимоди муштариён ва мардум, беҳсозии сифат ва роҳандозии намудҳои нави хизматрасонӣ, татбиқи сиёсати ҳисоббаробаркуниҳои ғайринақдӣ, ҳамчунин, фаъолияти бонкҳо ва ташкилотҳои қарзӣ аз рӯи нишондиҳандаҳои даромаднокӣ, пардохтпазирӣ, иҷрои уҳдадориҳо дар назди муштариён, ҷалби сармоя ва пасандозҳо ва масъалаҳои дигари низоми бонкӣ мавриди баррасии ҳамаҷониба қарор гирифтанд.
Муовини аввали раиси БМТ Ҷамолиддин Нуралиев таваҷҷуҳи ширкатдорони ҷаласаро ба тахассусияти роҳбарону масъулони ташкилотҳои қарзӣ, аз ҷумла ташкилотҳои амонатии қарзии хурд, тарзи дурусти идоракунии корпоративӣ бо мақсади пешгирӣ кардани хавфҳои эҳтимолӣ, риояи меъёрҳои муқарраршуда ва андешидани чораҳои қатъӣ аз ҷониби мақоми танзимкунанда нисбат ба ташкилотҳои қарзӣ дар ҳолати роҳ додан ба камбудиҳои ҷиддӣ, омода намудани кадрҳои баландихтисос ва такмили ихтисоси кормандони роҳбарикунанда барои низоми бонкӣ, таъмини шаффофият аз ҷониби бонкҳо, пешниҳоди ҳисоботи воқеӣ, роҳ надодан ба таҳриф ва такмили методологияи пешниҳоди омор ҷалб намуд.
Ёдрас месозем, ки ба ҳолати аввали соли 2019 дар низоми бонкии Ҷумҳурии Тоҷикистон 79 ташкилоти қарзӣ, аз ҷумла 17 бонк, 25 ташкилоти амонатии қарзии хурд, 6 ташкилоти қарзии хурд ва 31 фонди қарзии хурд фаъолият менамоянд.
Шуъбаҳои матбуоти БМТ ва иқтисоди «Ҷумҳурият»
Баёни ақида (0) Санаи нашр: 31.01.2019 №: 24 Мутолиа карданд: 924
