ҳуқуқ
ҶИНОЯТ ва ҶАЗО
ТАМАЪҶӮӢ БО УСУЛИ ХАТАРНОК
Аз тасарруфи 11 ҳазор доллар то шиканҷаи ҷабрдида
Кормандони милитсия дар ноҳияи Шаҳритуз марди 38 - солаеро боздошт намуданд, ки бо як ҳаммаслаки худ сокини 32 - солаи ҳамин ноҳияро ба нуқтаи бозиҳои пулакии компютерӣ даъват ва ба ӯ маводи нашъаовар додаву 10 000 долларашро гирифтааст.
Ин ҳодиса 10 январи соли ҷорӣ ба амал омада, тамаъҷӯён рӯзи дигар дар назди бозори марказии ноҳия аз ҷабрдида ба далели гӯё дар бозӣ бохтааст боз 1000 доллари дигар талаб карда гирифтаанд. Ба ин ҳам қаноат накарда, шахси ҷиноятпеша марди 32 - соларо боз ба маркази бозиҳои компютерӣ даъват намуда, ин навбат аз ӯ 128000 сомонӣ талаб намудааст. Чун ин дафъа маблағ ба даст наомад, 29 январ номбурда бо ҳаммаслаки худ ҷабрдидаро ба самти Ҷамоати деҳоти Обшорони ноҳия бурда, мавриди лату кӯб қарор медиҳанд.
Сомонаи ВКД бо нашри ин хабар иттиллоъ медиҳад, ки худи ҳамон рӯз номбурдагон дастгир шуда, нисбаташон бо моддаи 250 қисми 2 - и Кодекси ҷиноятии Ҷумҳурии Тоҷикистон парвандаи ҷиноятӣ оғоз шудааст.
"ШОҲОНА РЖАННАЯ"
Муомилоти ғайриқонунӣ ошкор шуд
Дар мақомоти корҳои дохилӣ нисбат ба як сокини шаҳри Гулистони вилояти Суғд бо моддаи 259 иловаи 1 - и Кодекси ҷиноятии Ҷумҳурии Тоҷикистон парвандаи ҷиноятӣ оғоз шудааст.
Бино ба иттилои маркази матбуоти Вазорати корҳои дохилӣ, боздоштшуда марди 51 - солаест, ки дар кӯшиши ба муомилот баровардани молу маҳсулоти тамғаношуда гумонбар мешавад. Ба қавли манбаъ, номбурда аз соли 2012 дар вазифаи намояндаи ҶДММ «Шоҳона» - и вилояти Суғд фаъолият намуда, 27 январи соли ҷорӣ тавассути автомашинаи тамғаи «Мерседес - Аттеко», аз шаҳри Душанбе ба шаҳри Конибодом 3252 зарфи дорои машруботи спиртии тамғаи «Шоҳона Ржанная» - ро бе тамғаи аксизӣ интиқол додааст.
Зарари расондашуда 59 ҳазору 660 сомониро ташкил дода, ҳоло тафтишоти ҳодиса идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 01.01.2019 №: 25 Мутолиа карданд: 1707
