порлумон
ПОЙТАХТ. ИНФРАСОХТОРИ ТАЪМИНИ ОБ НАВСОЗӢ МЕШАВАД
Дар доираи татбиқи як лоиҳа таъмини шабонарӯзии беш аз 75 ҳазор сокини ноҳияи Шоҳмансури шаҳри Душанбе бо оби тозаи ошомиданӣ боз ҳам беҳтар хоҳад шуд.
Файзиддин Қаҳҳорзода, вазири молияи Ҷумҳурии Тоҷикистон, дар ҷаласаи Маҷлиси намояндагони Маҷлиси Олӣ зимни баррасии Созишномаи грантӣ байни Ҷумҳурии Тоҷикистон ва Бонки осиёии рушд оид ба лоиҳаи беҳтар намудани обтаъминкунӣ ва санитария дар шаҳри Душанбе ба ин нукта ишора кард. Ба иттилои ӯ, маблағи умумии лоиҳа 45,8 миллион долларро дар бар мегирад, ки аз ин ҳисоб 41, 2 миллион доллар маблағи грантӣ ва 4,6 миллион доллари дигараш ҳиссаи Ҳукумати Ҷумҳурии Тоҷикистон мебошад.
Тавре зикр гардид, маблағҳои грантӣ асосан барои барқарорсозӣ, васеъ намудани инфрасохтори хидматрасонии соҳаи обтаъминкунӣ ва санитарӣ дар пойтахти мамлакат, таҳкими фаъолияти Корхонаи воҳиди давлатии «Обу корези Душанбе» ва дигар масъалаҳои марбут ба он ҷалб шудааст. Дар доираи татбиқи лоиҳа, ҳамчунин, барқарорсозӣ ва иваз намудани қубурҳои обрасонӣ, таъмини ҳолати хуби беҳдоштӣ барои қариб 350 ҳазор сокини шаҳри Душанбе, насби 52 ҳазор ҳисобкунак дар ҳуҷраҳои истиқоматӣ, васли 42 ҳисобкунаки калонҳаҷм, барқарор намудани 17 чоҳ дар пойгоҳи обполои «Кофарниҳон - 1», харидорӣ ва васли 22 адад насоси амудӣ, беҳбуди низоми безараргардонии оби ошомиданӣ дар назар аст. Лоиҳаи мазкур имкон медиҳад, ки сатҳи фарогирии хидматрасонӣ ба талаботи имрӯза ҷавобгӯ бошад.
Татбиқи ин тарҳ соли ҷорӣ шурӯъ шуда, қарор аст то соли 2024 ба анҷом расад.
Мунаввари САФАР, «Ҷумҳурият»
Баёни ақида (0) Санаи нашр: 01.01.2019 №: 25 Мутолиа карданд: 3804
