ҳуқуқ
ҶИНОЯТ ва ҶАЗО
ПОРА
ба дасти корманди комиссариати ҳарбӣ завлона зад
Кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон 18 январи соли ҷорӣ корманди зершуъбаи даъват ва тайёрии ҷавонон ба хизмати ҳарбии комиссариати ҳарбии ноҳияи Тоҷикобод Маҳмадраҳим Раҳимовро бо 9 ҳазор сомонӣ, ки ҳамчун пора талаб шудааст, дастгир намуданд.
Тибқи иттилои дафтари матбуоти агентӣ, М. Раҳимов ин маблағро барои додани билети ҳарбии ғайриқобили хизмати ҳарбӣ ба шаҳрвандон “Б” ва “В”, ки яке аз онҳо маъюб буда, дигаре дар Федератсияи Россия қарор дорад, тақозо кардааст. Дар ин бора бародари яке аз шаҳрвандон, ки аз ӯ ном бурда намешавад, ба агентӣ бо ариза муроҷиат намудааст.
Дар натиҷа, ҳамон рӯз Маҳмадраҳим Раҳимов ҳангоми гирифтани маблағ боздошт шуда, нисбат ба ӯ бо моддаи 247 қисми 2 банди “г”- и Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, тафтишоти пешакӣ идома дорад.
ҚАЛЛОБӢ
Ҷавобгарӣ барои 79 ҳазор доллар
Дар шаҳри Хуҷанд кормандони милитсия марди 32 - солаеро боздоштанд, ки ба қаллобӣ дар ҳаҷми махсусан калон гумонбар мешавад.
Ин нафар моҳи феврали соли 2015 бо роҳи фиреб ба бовари соҳибкор, марди 49 - солаи сокини шаҳри Хуҷанд, даромада, барои машғул шудан ба тиҷорат аз ӯ 79000 доллари ИМА гирифта, то ҳол маблағашро бар нагардондааст.
Ҳоло нисбат ба ӯ бо моддаи 247 қисми 3 - и Кодекси ҷиноятии Ҷумҳурии Тоҷикистон парвандаи ҷиноятӣ оғоз шудааст.
ФИРЕБИ ШАҲРВАНДОН
Боздошти нафаре, ки ваъдаи кор дар Норвегияву Олмон додааст
Дар асоси аризаи шаҳрванд «А» ба Агентии назорати давлатии молиявӣ ва мубориза бо коррупсияи Ҷумҳурии Тоҷикистон нисбат ба Нуралӣ Назриев, раиси иттифоқи хоҷагии деҳқонӣ ва соҳибкорон дар шаҳри Душанбе, бо ҷурми фиреб ва аз худ намудани 29000 сомонӣ парвандаи ҷиноятӣ оғоз шудааст.
Бино ба навиштаи сомонаи агентӣ, Н. Назриев ин маблағро аз шаҳрванд «А» бо ваъдаи таъмини ӯ ва шаш нафар рафиқаш бо ҷойи кор ва маоши баланд дар ҷумҳуриҳои Норвегия ва Олмон ҳанӯз моҳҳои август - октябри соли 2017 дар ду ҳолат гирифта, ваъдаашро иҷро накардааст.
Дар натиҷаи ин кирдори қасдона, Нуралӣ Назриев ба шаҳрванд “А” зарари калони моддӣ расондааст, ки боиси ҷавобгарӣ шуд. Манбаъ дар робита ба ин ҳодиса хабар медиҳад, ки парвандаи ҷиноятӣ нисбат ба Н. Назриев баъд аз анҷоми тафтиши пешакӣ ба суд ирсол гардидааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 07.02.2019 №: 29 Мутолиа карданд: 954
