ҳуқуқ
ҶИНОЯТ ва ҶАЗО
ОДАМКУШӢ
Гумонбарон ба даст афтоданд
Маркази матбуоти Вазорати корҳои дохилӣ 6 феврал аз ошкор шудани ду ҷинояти куштор ва боздошти гумонбарони ҳодиса хабар дод.
Тибқи иттилои манбаъ, ҳодисаи аввал дар шаҳри Турсунзода рух дода, марди 42 - солаи сокини Ҷамоати деҳоти Қаратоғи шаҳр дар ҳамдастӣ бо бародараш, дар заминаи рашк ба як сокини ҳамин ҷамоат дарафтода, ӯро шадидан лату кӯб намудаанд. Дар натиҷа, ҷабрдида бо ҷароҳатҳои вазнини ҷисмонӣ дар ҷойи ҳодиса ба ҳалокат расидааст. Феълан ҳар ду гумонбар аз ҷониби кормандони милитсия дастгир шуда, тафтишоти ҳодиса шурӯъ шудааст.
Куштори дувум дар Ҷамоати деҳоти Ортиқови шаҳри Конибодом сабт гардида, бино ба гузориши сомонаи ВКД, дар ҳолати сархушӣ ба вуқӯъ омадааст. Вобаста ба ҷузъиёти ҳодиса гуфта мешавад, ки марди 50 - солаи сокини Ҷамоати деҳоти Ортиқов нимаи дувуми рӯзи 5 феврал дар ҳолати мастӣ ҳамсари 46 - солаашро бо зарби корд ба ҳалокат расондааст.
Номбурда дар содир намудани ҷинояти одамкушӣ гунаҳгор дониста шуда, нисбаташ парвандаи ҷиноятӣ бо моддаи 104 қисми 1 - и Кодекси ҷиноятии Ҷумҳурии Тоҷикистон оғоз гардидааст.
РИШВАСИТОНӢ
ҳуқуқшиноси "Агроинвестбонк" - ро ба толори суд бурд
Агентии назорати давлатии молиявӣ ва мубориза бо коррупсияи Ҷумҳурии Тоҷикистон парвандаи ҷиноятӣ нисбат ба ҳуқуқшиноси Ҷамъияти саҳомии кушодаи “Агроинвестбонк” Суҳроб Раҳимовро баъд аз анҷоми тафтишоти пешакӣ барои моҳиятан баррасӣ намудан ба суд ирсол кардааст.
Тавре маркази матбуоти агентӣ иттилоъ медиҳад, боздошти С. Раҳимов дар пайи аризаи шаҳрванд «А» ба ин ниҳод иттифоқ афтодааст. Муроҷиаткунанда дар номае ба агентӣ навиштааст, ки ҳуқуқшинос барои аз гарави бонк озод намудани манзилҳои истиқоматии воқеъ дар шаҳри Душанбе, кӯчаҳои Чортут - 61, Ҳилолӣ - 44 ва Хлопзаводская - 95, 13 ноябри соли 2018 аз ӯ ба андозаи 2500 доллари амрикоӣ пора талаб намуда, то кунун 1000 долларашро гирифтааст.
Дар асоси ин шикоят худи ҳамон рӯз нисбат ба С. Раҳимов бо моддаи 279 қисми 3 - и Кодекси ҷиноятии Ҷумҳурии Тоҷикистон парвандаи ҷиноятӣ оғоз шуда, номбурда баъди аз шаҳрванд “А” гирифтани маблағи 14000 сомонӣ баробар ба 1500 доллари дигар аз тарафи маъмурони агентӣ дастгир шудааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 11.02.2019 №: 31 Мутолиа карданд: 954
