иқтисод
ХУРОСОН. ТЕППАҲО БОҒИСТОН МЕШАВАНД
Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатӣ низ доир ба истифодаи самараноки замин ба масъулони соҳа дастуру супоришҳо дода, таъкид карданд: «Ҳадафи стратегии дигар, ки ба таъсиси ҷойҳои корӣ ва афзун гардондани иқтидори содиротии кишвар таъсири бевосита мерасонад, ҳифзи амнияти озуқаворӣ тавассути рушди соҳаи кишоварзӣ мебошад».
Алҳол хоҷагиҳои деҳқонии боғпарвари кишвар бо афзун намудани ҳаҷми истеҳсоли маҳсулоти тозаи экологӣ бозорҳои дохилиро бо меваҳои шаҳдбор таъмин намуда, қисми онро содирот мекунанд. Аммо тавре Сарвари давлат таъкид карданд, ҳанӯз ҳам имкониятҳои мавҷуда босамар истифода намешаванд.
Иқлими ноҳияи Хуросон барои боғдорию токпарварӣ хеле мусоид мебошад. Боғпарварони ноҳия ҳидоятҳои Пешвои миллатро оид ба бунёди боғу токзорҳои нав сармашқи кор намуда, ба дастовардҳои хуб ноил шуданд. То ба имрӯз дар майдони 2543 гектар боғу токзор бунёд шудааст. Бештари боғу токзор дар талу теппаҳои бо намӣ таъмин бунёд ёфтаанд. Аз маҷмӯи майдони боғу токзор айни ҳол 1349 гектар самаровар гардидааст. Аз ин 156 гектар боғи интенсивӣ мебошад. Дар 136 гектар боғи навбунёд ниҳолҳо тариқи обдиҳии қатрагӣ парвариш меёбанд. Ин усул барои нашъунамои мунтазами дарахт, сарфаи об ва вайрон нашудани ҳолати ҳосилхезии замин мусоидат менамояд.
Тавре Раҳматулло Сафарзода, раиси ноҳия, иброз дошт, дастуру ҳидоятҳои Пешвои миллат моро водор менамоянд, ки диққати аввалиндараҷаро ба яке аз бахшҳои асосии таъмини амнияти ғизоӣ - рушди боғу токпарварӣ равона намоем. Аз ин рӯ, кишоварзони ноҳия баҳри иҷрои супоришҳои Ҳукумати ҷумҳурӣ ва ҳиссагузорӣ дар таъмини амнияти ғизоии мамлакат имсол дар пеши худ нақша гузоштаанд, ки аз ҳисоби заминҳои лалмӣ боз зиёда аз 100 гектар боғу токзори нав бунёд намоянд.
Иронбӣ МӮСОЗОДА, «Ҷумҳурият»
Баёни ақида (0) Санаи нашр: 15.02.2019 №: 35 Мутолиа карданд: 976
