ҳуқуқ
ИҚРОР ВА ПУШАЙМОНӢ Ё ЭЪТИРОФЕ, КИ БА НАҲЗАТИЁН МИСЛИ “РАЪДУ БАРҚ ДАР РӮЗИ ОФТОБӢ” БУД
Чанде пеш Коллегияи судӣ оид ба парвандаҳои ҷиноятии Суди Олии Ҷумҳурии Тоҷикистон аризаи маҳкумшуда Сайид Қиёмиддини Ғозиро мавриди баррасӣ қарор дода, ҷазои ӯро аз 25 соли қаблӣ то ба 7 сол поён овард. Дар тавзеҳи ин масъала зикр шуд, ки 18 сол кам шудани муҳлати ҷазои Қиёмиддин Ғозӣ ба мусоидат дар ошкор сохтани як қатор ҷиноятҳои вазнин, фош кардани ашхоси ба ин ҷиноятҳо дастдошта ва аз кирдорҳои содирнамудаи худ пушаймон гаштани номбурда, рабт дорад.
Лозим ба ёдоварист, эътирофи Сайид Қиёмиддини Ғозӣ, ки дар ВАО - и кишвар пахш ва нашр шуда буд, эътимоду таваҷҷуҳи боқимондаи ҳаводорони наҳзатиҳоро аз беху решааш барканд. Моҳиятан барои роҳбари ҳизби дар Тоҷикистон мамнӯи наҳзат ва думравонаш бо чунин шева эътироф намудани гуноҳ, санги маломат задан ба сари ҳамсафон, ифшо намудани “саҳм” - и кишвари ба мо “дӯст” дар ин раванд, “раъду барқ дар рӯзи офтобӣ” маҳсуб мешавад.
Эътирофи “генерали мардумӣ” наҳзатиҳоро ба маънои томаш шармандатар карда, собит намуд, ки мазҳаби шиаро қабул кардани наҳзатиён далели бебаҳс аст. Қиёмиддини Ғозӣ расман, тариқи телевизион далелҳои зиёд пешниҳод карда, минҷумла гуфт, ки ҷалби наҳзатиҳо ба мазҳаби шиа таърихи тулонӣ дошта, аз оғози фаъолияташон маншаъ мегирад.
“Генерали мардумӣ” эътироф кард ва ба аҳли ҷомеа ҳушдор дода буд, ки роҳбари наҳзат ва “пайравон”- аш дар умрашон ягон кори хайрро анҷом надодаанд. Дороиҳояшон музди хиёнату ҷиноятҳояшон мебошад. Дар ин эътироф манбаи пайдоиши молу сарват, бозору иншоот, мошинҳои гаронбаҳои хориҷӣ барои худу фарзандон, сафарҳои беҳисоб ба кишвари “ҳамдину ҳамзабон” дигар мамолики манфиатдор, зиндагию маишат дар кишварҳои хориҷӣ бо далелу арқоми асоснок матраҳ шуд.
Ҳарчанд наҳзатиҳои террорист дар мавриди эътирофи Қиёмиддини Ғозӣ чун ҳамешагӣ сафсатапароканӣ ва афсонапардозӣ карданд, вале далели бебаҳс аст, ки номбурда баъд аз ҳаводиси охир (манзурам кӯшиши табадуллоти давлатӣ аст), ки парда аз симои манфури ташкилоти террористӣ бардошта шуда, аҳдофи муғризонаи онҳоро барои тамоми ҷаҳониён рӯнамоӣ кард, аз мавқеъгирии қаблиаш пушаймон шуд. Нуктаи муҳим он аст, ки “генерали мардумӣ” бо вуҷуди худ аз гуноҳ орӣ набудан, аз хиёнату зиштӣ, бешарафиву бевиҷдонии ҳамсафонаш хаста шуд. Зеро Қиёмиддини Ғозиро, ки то чанде пеш дар «домон» - и роҳбари наҳзат ва ҳаммаслаконаш «азми намоз гузоштанро дошт», хеле моҳирона гул заданд. Ба ибораи дигар, “генерали мардумӣ” то ин замон «ноларо пинҳон дармекашид” ва чун симои аслӣ ва аҳдофи наҳзатиҳо пурра ҳувайдо ва ошкор шуд, «сина» - аш гуфт, ки «ман танг омадам фарёд кун»…
Муҳимтар аз ҳама, номбурда пурра дарк намуд, ки дини ислом барои роҳбарони ташкилоти террористии наҳзат василаи расидан ба мансаб ва амалӣ намудани мақсадҳои нопок маҳсуб ёфта, дар ин ҷода арзишҳои инсонӣ ва ҳуқуқу манфиатҳои ҳамсафон ва аҳли ҷомеа «як пули пучак» арзиш надоштанд. Он рӯз дур нест, ки ангуштшумор думравони раиси ташкилоти террористӣ - эктремистӣ низ ин воқеиятро дарк мекунанд. Вақт нишон хоҳад дод...
Ҷӯрахон АСОЕВ, таҳлилгар
Баёни ақида (0) Санаи нашр: 18.02.2019 №: 36 Мутолиа карданд: 962
