иқтисод
НОҲИЯИ РӮДАКӢ. БУНЁДИ 414 ИНШООТ БА ИСТИҚБОЛИ ҶАШНИ МИЛЛӢ
Соҳибистиқлолӣ ва сулҳу суботи кишвар замина фароҳам овард, ки симои шаҳру ноҳияҳои Тоҷикистон комилан дигаргун гардад. Дар ноҳияи Рӯдакӣ низ дар як муддати кӯтоҳ даҳҳо иншооти таъйиноти гуногун, аз ҷумла маъмурӣ, майдончаҳои варзишӣ, гулгашту хиёбонҳои гулпӯш ва боғҳои фарҳангию фароғатӣ, мавриди истифода қарор гирифтанд.
Дар нақшаи чорабиниҳои мақомоти иҷроияи маҳаллии ҳокимияти давлатии ноҳия ҷиҳати омодагии ҳамаҷониба ба Ҷашни 30 - солагии Истиқлолияти давлатӣ диққати асосӣ ба корҳои бунёдкорӣ, ободонию созандагӣ ва ба истифода додани муассисаҳои иҷтимоӣ, корхонаҳои истеҳсолӣ ва таъсиси ҷойҳои корӣ равона гардидааст. То баргузории ин ҷашн 414 иншоот, аз ҷумла 76 иншооти маърифатӣ (мактаб, биноҳои таълимӣ, синфхонаҳои иловагӣ, муассисаҳои томактабӣ, марказҳои касбу ҳунаромӯзӣ, забономӯзӣ), 72 сартарошхона, 45 маркази саломатӣ, бунгоҳи тиббӣ, ташхисгоҳи замонавӣ, коргоҳҳои дорубарорӣ ва дорухонаҳо, 3 китобхона, 35 толору майдони варзишӣ, 9 растаи ҳунармандӣ, 9 кошонаи ҳусн, 5 ҳаммом, 4 маркази дилхушӣ, 8 гулгашт, 10 иншоот оид ба масъалаҳои таъминоти аҳолӣ бо оби ошомиданӣ, 15 пул ва роҳ, 68 маркази савдо, мағозаю дукон ва марказҳои хизматрасонӣ, ҳамчунин, 17 корхонаи истеҳсолӣ, бунёд мегардад.
Соли сипаришуда 27 иншоот, аз ҷумла 7 иншоот дар соҳаи маориф, 3 иншоот дар соҳаи савдо ва хизматрасонӣ, 3 майдонча ва толори варзишӣ, 4 иншооти коммуналӣ, 6 коргоҳи истеҳсолӣ ва 4 иншооти хизматрасонӣ, ба истифода дода шуд.
Рустам Акрамзода, раиси ноҳия, гуфт, ки иншооти ба истифода додашуда, аз ҷумла мағозаи хӯрокворӣ, дорухона ва нуқтаи тезтайёр дар кӯчаи Шерозии шаҳраки Сомониён аз тарафи соҳибкор А. Ҳамдамов, нуқтаи шоназании пахта аз тарафи соҳибкор Шамсуддин Мирзоев дар деҳоти Чоргултеппа, майдончаи варзишӣ дар деҳаи Гулбутта бо арзиши 100 ҳазор сомонӣ аз тарафи мақомоти худфаъолияти ҷамъиятӣ, гузарондани қубури оби нӯшоӣ дар деҳаи Боғаки Поёни Ҷамоати деҳоти Эсанбой, бинои маъмурии шуъбачаи минтақаи Эсанбойи ШВКД - 1 - и ноҳияи Рӯдакӣ, корхонаи мурғпарварӣ ва коргоҳҳои истеҳсолии ҳасиббарорӣ, мебел ва хишт аз тарафи соҳибкор Хайрулло Давронов дар деҳоти «Россия», маҷмааи варзишӣ барои машқ, футболи хурд, бокс ва ҳаммом бо таъсиси 5 ҷои корӣ дар деҳаи Обчакорони Ҷамоати деҳоти Чимтеппа аз тарафи гурӯҳи соҳибкорони маҳаллӣ, маркази савдо дар деҳаи Корвони Ҷамоати деҳоти Чимтеппа аз тарафи соҳибкор Хайриддин Тоиров ба маблағи 1,4 миллион сомонӣ сохта шудаанд. Корҳои сохтмонӣ дар иншооти дигари ҷашнӣ бомаром идома доранд.
Рустам Акрамзода аз дастовардҳои назарраси ноҳия ва омодагӣ ба Ҷашни 30 - солагии Истиқлолияти давлатии Ҷумҳурии Тоҷикистон дар ноҳия дар самти корҳои ободониву созандагӣ ёдовар гардида, баён дошт, ки сокинони ноҳия аз ин ҳама ободиву пешравиҳо шукргузоранд ва талош доранд, ки дар пайи иҷрои ҳидоятҳои Пешвои миллат ҷашни бузурги миллиро сазовор истиқбол намоянд.
Шаҳбоз АБРОР, «Ҷумҳурият»
Баёни ақида (0) Санаи нашр: 19.02.2019 №: 37 Мутолиа карданд: 1184
