президент
Машварати корӣ дар ҳузури Сардори давлат
18 январи соли 2010 Президенти Ҷумҳурии Тоҷикистон Эмомалӣ Раҳмон бо масъулини ҳукумати мамлакат ва Дастгоҳи иҷроияи Сардори давлат, роҳбарони як қатор вазорату идораҳо ва дигар шахсони масъул машварати корӣ доир намуд.
Дар машварат масоили барқарорсозии мавзеъҳои аз заминларза зарардидаи ноҳияи Ванҷ, омодагӣ ба маҷлиси ҷамъбастии солона, рафти иҷрои буҷети давлатӣ, фурӯши саҳмияҳои нерӯгоҳи Роғун, таҳияи нақшаи чорабиниҳо барои иҷрои пешниҳодҳои соҳибкорону тоҷирони ватанӣ, татбиқи нақшаҳои сершумор дар соҳаи энергетика, рафти ниҳолшинониву боғдорӣ, омодагӣ ба киштукори баҳорӣ ва ба ду конфронси байналмилалӣ баррасӣ шуд.
Сардори давлат Эмомалӣ Раҳмон дастур дод, ки ҳарчи зудтар шароити зисти муваққатӣ барои аҳолии аз заминларза зарардидаи ноҳияи Ванҷ муҳайё карда шавад ва онҳо аз кӯмакҳои моддию маънавӣ бархӯрдор бошанд. Ҳамчунин супориш дода шуд, ки баҳри дар ҷойҳои бехатар барои онҳо бунёд намудани манзилу деҳаҳои нав тадбирҳо андешида шаванд.
Дастур дода шуд, ки тамоми пешниҳод ва дархостҳои соҳибкорону тоҷирони ватанӣ, ки дар мулоқоти Президенти Ҷумҳурии Тоҷикистон бо онҳо ва тавассути почтаю воситаҳои ахбори умум манзур гаштаанд, ҳангоми таҳияи нақшаи чорабиниҳо баҳри омӯзиш ва иҷро ба инобат гирифта шаванд.
Ҳамчунин барои кашидани хатҳои нави интиқоли нерӯи барқ ва бо суръату сифати баланд татбиқ намудани нақшаҳо баҳри бунёди нерӯгоҳҳои хурду бузурги обӣ масъулон супоришҳои мушаххас гирифтанд.
Дастур дода шуд, ки баҳри вусъати корҳои ниҳолпарварӣ, бунёди боғҳои наву барқарорсозии боғоти кӯҳна ва ҳамчунин саривақт оғоз кардани киштукори баҳорӣ ва таъмини хоҷагиҳо бо тухмиҳои хушсифат чораҳои зарурӣ андешида шаванд.
Сардори давлат Эмомалӣ Раҳмон дар назди масъулин ҳамчунин баҳри омодагӣ ба Конфронси байналмилалии об ва ҷаласаи вазирони корҳои хориҷии кишварҳои аъзои Созмони Конфронси Исломӣ, ки соли равон дар Тоҷикистон баргузор мегарданд, вазифаҳои мушаххас гузошт.
Баёни ақида (0) Санаи нашр: №: Мутолиа карданд: 3522
