фарҳанг
НАВРӮЗ: ДИРӮЗ ВА ИМРӮЗ
Наврӯз аз муқаддастарин ва муборактарин ҷашнҳои мардуми ориёинажод мебошад. Абурайҳони Берунӣ Наврӯзро Иди Соли Нав, Иди Сари Сол низ меномад.
Таърихи пайдоиши Наврӯз гуногун мебошад. Як ривояти басо дилангез дар бораи ин ҷашни бузург чунин аст: "Гӯё, рӯзе шоҳаншоҳ Ҷамшед бар золимон ва девон ғолиб омада, тахте сохт ва бо он ба осмон парвоз карда, аз Худои мутаол хоҳиш кард, ки гармову сармо ва беморию бадбахтиҳоро аз сари мардуми азизаш дур созад. Ин дуои неки Ҷамшед бар Худованди бузург писанд омаду мустаҷоб гардид ва бадбахтиҳову офатҳо аз сари мардум бардошта шуд".
Мардум ин рӯзро дар зиндагиашон рӯзи нав хонданду баъдҳо он бо номи Наврӯз машҳур гардид. Яъне, рӯзи наву бахти нав ва саодати бузургро ҳар сол ҷашн гирифтанд. То ба имрӯз одамон дар ин рӯз ба якдигар бо дуои хайр саломатӣ ва орзуҳои некро таманно мекунанд.
Ҳамин тавр, дар муддати ҳазорсолаҳо мардуми ориёинажод бар сарнавишти талху ширин ва ташаккулу инкишофи давру замон, ҳукмфармоии дину оинҳо, аҷнабиён ин ҷашни бобоиро муқаддас шуморида, чун гавҳаракаи чашм ҳифз намудаанд ва бо як меҳру муҳаббати хосса дастраси мардумони дигар гардонданд. Ин ҷашни муқаддас дар тамоми Тоҷикистони соҳибистиқлол бо тамоми шукӯҳу шаҳомат таҷлил мегардад. Наврӯз баъди соҳибистиқлол шудани кишвар мазмуни нав пайдо кард. Ба шарофату ташаббуси Пешвои миллат, Президенти азизи мо Наврӯз ҷаҳонӣ ва байналмилалӣ гашт. Яъне, онро бо тамоми шукӯҳу шаҳомат дар бисёр кишварҳои дунё ҷашн мегиранд. Агарчи дар таҷлили он тағйирот ба чашм мерасад, аммо ҷавҳар як аст. Дар арафаи Наврӯз хонаҳоро рӯбучину тоза карда, оро медиҳанд ва гандумро тоза намуда, дар зарфи махсус месабзонанд. Аз рӯи он пешбинӣ месозанд, ки сол чи гуна меояд. Ба истиқболи ин ҷашн дастархонро бо ҳафтсину ҳафтшин, таомҳои болаззат ва ҳалвою шириниҳои гуногун зинат медиҳанд. Аз ҳафт дарахт ҳафт шохча бурида, ба рӯи дастархон мегузоранд. Бозиҳою дилхушиҳо ташкил мекунанд ва сайру тамошои беруна баргузор мегардонанд. Хӯроки асосии ин ҷашни бузургро суманак ташкил медиҳад.
Ҳамин тариқ, ҳамаи мо масъулият дорем ва вазифаи аввалиндараҷаамон аст, ки шукӯҳу шаҳомати ин ҷашни фархундаро боз ҳам афзунтар гардонем.
Майсара ФОЗИЛБЕКОВА, омӯзгори мактаб – интернати махсуси таҳсилоти асосии № 2, шаҳри Душанбе
Баёни ақида (0) Санаи нашр: 13.03.2019 №: 51 Мутолиа карданд: 1007
