фарҳанг
НОРАК. ОМОДАГӢ БА ИСТИҚБОЛИ НАВРӮЗ
Бо мақсади амалӣ намудани дастуру ҳидоятҳои Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон барои дар сатҳи баланд таҷлил намудани ҷашнҳои 30 – солагии Истиқлолияти давлатии Ҷумҳурии Тоҷикистон ва Наврӯзи байналмилалӣ мақомоти иҷроияи ҳокимияти давлатии шаҳри Норак мувофиқи нақшаи чорабиниҳо сохтмони 165 иншооти таъйиноташон гуногунро, ки ба болоравии сатҳи иҷтимоию иқтисодии шаҳр, зиндагии аҳолӣ ва ба ин васила таъмин намудани шаҳрвандон бо ҷойи корӣ равона гардидаанд, таҳрезӣ намудааст. Айни ҳол сохтмони ин иншоот бомаром идома дорад. То Ҷашни Наврӯзи байналмилалӣ 10 иншоот мавриди баҳрабардорӣ қарор мегирад.
Меҳнаткашони шаҳри Норак барои дар сатҳи баланд таҷлил намудани ҷашнҳои 30 – солагии Истиқлолияти давлатии Ҷумҳурии Тоҷикистон ва Наврӯзи байналмилалӣ - 2019 омодагии ҳамаҷониба гирифта, ба корҳои ободонию созандагӣ ва сабзкорӣ вусъати тоза мебахшанд. То Ҷашни Наврӯзи байналмилалӣ иншооти рамзҳои давлатӣ - Парчами давлатии Ҷумҳурии Тоҷикистон ва Нишони давлатии Ҷумҳурии Тоҷикистон мавриди баҳрабардорӣ қарор мегиранд.
Барои фароҳам овардани шароити мусоиди истироҳату фароғати сокинону меҳмонон бо дастгирии мақомоти иҷроияи ҳокимияти давлатӣ ва соҳибкорони шаҳр як гулгашти замонавӣ бунёд гардида, бо ниҳолҳои сояафкан, ороишӣ, гулу гулбуттаҳо ва роҳравҳои он бо сафолакҳои ороишию бетонӣ зинат меёбанд. Дар кӯчаи Рӯдакӣ бо иқдоми соҳибкор Абдулло Садриддинов сохтмони бинои истиқоматии 7 – ошёна дар арафаи анҷомёбист. Ҳамчунин, дар кӯчаи Рӯдакӣ сохтмони майдончаи варзиш ва бозии кӯдакон дар масоҳати 1 ҳазору 800 метр дар арафаи анҷомёбӣ қарор дорад. Ин майдончаи варзиш аз ҷониби соҳибкори маҳаллӣ Ализода Раҷабалӣ сохта мешавад. Сохтмони бинои истиқоматии панҷошёна бо маркази савдо ва хизматрасонӣ ҳам бо иқдоми соҳибкори маҳаллӣ Ҷӯрабек Ҳақназаров ба итмом расида истодааст.
Корхонаҳои саноатӣ дар истеҳсоли маҳсулоти ватанӣ заминаи боэътимод гузошта, сол ба сол фаъолияти худро беҳтар намуда истодаанд. ҶСП «Корхонаи таҷрибавии механикӣ» қолабҳои бетонгирии нақбҳо, қолабҳои росткунҷа ва аркои бетонӣ барои деворҳои нақбҳо, электроди кафшергарӣ, кислород, симтӯрҳои деворбандӣ ва байни болопӯшҳои бом, симхор, хокаи бетонӣ, шишаи моеъ, хишти пухта ва маҳсулоти дигари фармоишӣ истеҳсол мекунад. Лозим ба ёдоварист, ки корхонаи таҷрибавии механикии шаҳри Норак дар сохтмони Неругоҳи барқии обии «Роғун» низ бо истеҳсоли қуму шағал, муму қир барои корҳои зеризаминӣ ва кашондани бор саҳми арзандаи худро гузоштааст.
Масъулони ҶСП «Корхонаи таҷрибавии механикии шаҳри Норак» тасмим гирифтаанд, ки корхонаи хурди истеҳсоли резин барои варзишгоҳҳо ва сафолакҳои резинии ороишӣ бунёд намоянд. Айни ҳол сохтмони ин корхонаи хурди истеҳсолӣ дар арафаи анҷомёбӣ қарор дошта, дар он таҷҳизоти замонавӣ васлу насб карда мешаванд. Корхона метавонад баъди ба фаъолият шурӯъ намудан, 20 коргари маҳаллиро бо ҷойи кори доимӣ таъмин намояд.
Айни ҳол дар корхонаи таҷрибавии механикӣ 750 нафар ба кор ҷалб ва бо шароити хуби корӣ таъмин гардидаанд. Ёдрас месозем, ки соли 2013 Пешвои муаззами миллат зимни сафари кории хеш ба шаҳр аз ин корхона дидан карда, ба масъулини он дастур доданд, ки теъдоди ҷойҳои кориро зиёд намоянд.
Ба истифода додани иншооти гуногун дар Ҷашни Наврӯзи байналмилалӣ дар шаҳр бори дигар аз он гувоҳӣ медиҳад, ки сол аз сол корҳои созандагию ободонӣ дар диёрамон ҳамаҷониба вусъат ёфта, ба ин васила сатҳу сифати зиндагии мардум беҳтару хубтар мегардад.
Зокир ҲАСАН, “Ҷумҳурият”
Баёни ақида (0) Санаи нашр: 14.03.2019 №: 52 Мутолиа карданд: 774
