фарҳанг
НАВРӮЗ ОМИЛИ МУҲИМИ МУАРРИФИИ ТОҶИКИСТОН БА ҶАҲОНИЁН
Дар рӯзҳои Иди байналмилалии Наврӯз барои боз ҳам баланд бардоштани ҳисси ватандӯстиву ҳувияти миллии сокинони мамлакат ва муаррифии Душанбе ҳамчун шаҳри сайёҳӣ дар пойтахт баргузории фестивали сайёҳии “Наврӯз мероси фарҳангии сайёҳӣ” ва дар доираи он барпо гаштани чорабиниҳои зиёд ба нақша гирифта шудаанд.
Ба ин мақсад, 14 феврали соли ҷорӣ қарори раиси шаҳри Душанбе Рустами Эмомалӣ дар бораи таҷлили Иди байналмилалии Наврӯз – 2019 ба тасвиб расид.
Наврӯз омили дар сатҳи ҷаҳонӣ муаррифӣ шудани симои мамлакат ҳамчун кишвари дорои тамаддуни қадима ва захираҳои табиӣ мебошад. Бо назардошти ин, дар рӯзҳои ҷашнгирии Наврӯзи байналмилалӣ ширкатҳои сайёҳии ватанӣ дар минтақаҳои гуногуни ҷумҳурӣ хатсайрҳои ҷолиб тарҳрезӣ намуда, иди аҷдодии тоҷиконро ҳамчун бренди сайёҳӣ ба ҷаҳонгардон муаррифӣ менамоянд. Мувофиқи арзёбии коршиносон, муаррифии Иди Наврӯз дар бозори ҷаҳонии сайёҳӣ чун мероси таърихию фарҳангии миллати тоҷик метавонад садҳо ҳазор сайёҳи хориҷиро ба кишварамон ҷалб созад.
Боиси фараҳмандист, ки ҷашнгирии Наврӯзи байналмилалӣ солҳои охир хусусиятҳои ба худ хосро касб намуда истодааст. Дар ин росто, чанде пеш Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ангораи Ҷашни байналмилалии Наврӯз барои соли 2019-ро тасдиқ намуданд. Ангора доирашакл буда, дар байни он кураи Замин, аз ду тарафаш Парчами давлатӣ ва пайки баҳор – суманак, парасту, нақшу нигори гулдӯзӣ ҳамчун рамзи ҳунарҳои мардумӣ ва рангинкамон бо навиштаҷоти «Наврӯз – 2019» мунъакис шудаанд. Ғайр аз ин, дар мувофиқа бо Пешвои миллат рамзи Ҷашни байналмилалии Наврӯз ва Соли нави миллӣ, инчунин, намуди халтачаҳои наврӯзӣ барои туҳфаҳо тасдиқ гардид. Он аз тарафи Иттифоқи рассомони Тоҷикистон дар асоси хулосаҳои донишмандони Академияи илмҳо омода шудааст. Рамзи ҷашн арчамонанд буда, аз ҳафт табақ иборат мебошад, ки мазмуни гардиши фалак ва коинотро ифода менамояд. Ҳар давра бо нақшу нигори миллӣ ороиш ёфтааст. Суманак ва гули наврӯзӣ дар асоси хулосаҳои донишмандон, мардумшиносон, фолклоршиносони тоҷик ва дигар олимони ҳавзаи Наврӯз интихоб шуда, минбаъд ҳамчун рамзи истиқболи Ҷашни Наврӯзи байналмилалӣ, Соли нави миллӣ ва пайки омад-омади баҳори файзбор дар ҷумҳурӣ истифода хоҳанд шуд. Ба вазорату идораҳо, ташкилоту муассисаҳо, мақомоти иҷроияи ҳокимияти давлатии вилоятҳо ва шаҳру ноҳияҳо тавсия дода шудааст, ки рамзи мазкурро ба ҷойи арча дар назди идораҳо, кӯчаву хиёбонҳо, иншооту хонаҳои истиқоматӣ ҳамчун рамзи Ҷашни Наврӯз ва таҷлили Соли нави миллӣ аз 19 то 25 марти соли равон насб намоянд. Дар халтачаҳои наврӯзӣ бошад, туҳфаҳо ба ятимон, беморон, барҷомондагон, пиронсолон, кӯдакону наврасон тақдим карда шаванд.
Ҳамаи ин тадбиру чораҳо ҷиҳати дар сатҳи баланди ташкилӣ, ғоявию бадеӣ таҷлил намудани Иди байналмилалии Наврӯз ва беҳтару бештар муаррифӣ шудани ҷашни аҷдодии миллиамон равона гаштанд, ки, бешубҳа, ҳадафрас хоҳанд буд.
Ш. ҚУРБОН, “Ҷумҳурият”
Баёни ақида (0) Санаи нашр: 15.03.2019 №: 53 Мутолиа карданд: 982
