фарҳанг
"ФАРҲАНГ ВА САНЪАТ" БА ФЕҲРИСТИ МАҶАЛЛАҲОИ ТАҚРИЗШАВАНДА ВОРИД ШУД
Комиссияи олии аттестатсионии назди Президенти Ҷумҳурии Тоҷикистон дар асоси қарори раёсати комиссия ва хулосаи шӯрои экспертӣ маҷаллаи илмии «Фарҳанг ва санъат» - и Донишкадаи давлатии фарҳанг ва санъати Тоҷикистон ба номи Мирзо Турсунзодаро ба феҳристи маҷаллаҳои илмии тақризшавандаи ҷумҳурӣ ворид намуд.
Маҷалла аз ҷониби Вазорати фарҳанги Ҷумҳурии Тоҷикистон соли 2001 бо номи «Олами ҳунар» номнавис шуда, то соли 2017 даҳ шумораи он ба табъ расид. Шурӯъ аз соли 2017 «Олами ҳунар» ба нашрияи «Фарҳанг ва санъат» табдили ном кард. Дар он натиҷаҳои илмию пажӯҳишии рисолаҳои илмӣ барои дарёфти дараҷаи номзад ва доктори илм нашр мегарданд. Мақолаҳои илмии профессору дотсентҳо, докторанту (PhD) аспирантон ва магистрҳои донишкада, инчунин устодони дигар муассисаҳои таҳсилоти олии касбии мамлакат ва кишварҳои Иттиҳоди Давлатҳои Мустақил, аз ҷумла Федератсияи Россия ва Ҷумҳурии Ӯзбекистон маводи асосии маҷалларо ташкил медиҳанд.
Маҷалла дар як сол 4 маротиба аз чоп баромада, дар мақолаҳо масоили вобаста ба истиқлолияти фарҳангӣ, ҳамкориҳои минтақавӣ, рушди санъати миллӣ, мушкилоти соҳаи китобдорӣ - иттилоотӣ ва дигар мавзӯъҳои муҳими соҳаҳои фарҳанг ва санъати кишвар мавриди таҳлили амиқи илмӣ қарор мегиранд.
Маҷалла аз се бахш: фарҳангшиносӣ ва фаъолияти иҷтимоӣ - фарҳангӣ, санъатшиносӣ - (мусиқӣ, театр, кино, санъати тасвирӣ, хореография), китобдорӣ - иттилоотӣ ва рӯзноманигорӣ (журналистика) иборат мебошад. Мундариҷаи он дар шакли фишурда ва калидвожаҳо ба забонҳои тоҷикӣ, русӣ ва англисӣ ба РИНС ворид карда мешавад. «Фарҳанг ва санъат» дорои рақами байналмилалии силсиланашрия низ мебошад.
Додоҷон РӮЗИЕВ, рӯзноманигор
Баёни ақида (0) Санаи нашр: 10.04.2019 №: 68 Мутолиа карданд: 1076
