фарҳанг
"ФУРӮҒИ СУБҲИ ДОНОӢ" ФУРӮҒИ МАЪРИФАТ АСТ
Чанде пеш бо Амри Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Озмуни ҷумҳуриявии «Фурӯғи субҳи доноӣ…» эълон гардид. Ин озмунест, ки дар он ҳама баранда мешаванд. Зеро донишу маърифате, ки иштирокчиён аз хондани китоб ҳосил мекунанд, бо онҳо мемонад ва ҳамин, аллакай, пирӯзии бузургест.
«Фурӯғи субҳи доноӣ…» мисли пайки баҳорон беихтиёр пиру барноро фаро гирифта, дар ҳар як хонадон, бавижа дар рустоҳои дурдасти кишвар чароғи илму донишро фурӯзон кард. Фурӯғ, ки ба маъно нуру зиёст, дилу дидаҳоро рӯшану мағзҳоро бедор намуд.
Бештари мардум на ба ҳаваси барандаи озмун шудан, балки ба хотири дастгирии иқдоми роҳандозишуда, барои ёрмандӣ ба фарзандону наберагонашон ба китоб муроҷиат мекунанд ва бо ин роҳ, ба донишашон дониш фузуда, аз маълумоти тоза ва вожаҳои нав огоҳӣ меёбанд. Аз ҳамовозиҳои пиру барно дар ҷомеа ва дар шабакаҳои интернетӣ пай бурдан мумкин аст, ки халқ ташнаи чунин иқдом буд.
Даври нахустини он аз ҷамоатҳои деҳот оғоз ёфта, марҳила ба марҳила то ба сатҳи ҷумҳурӣ мерасад. Минбаъд кори китобхонаву китобдорон боз ҳам меафзояд, мардум дар ҷустуҷӯи китоб ба дари китобхона ва дуконҳои китобфурӯшӣ меоянд. Дар ин росто, аз китобдорону масъулон фарҳанги баланди муошират бо муштариён талаб карда мешавад. Бахшҳои хизматрасонии сайёри китобхонаҳои ноҳиявию шаҳрӣ боз ҳам фаъолтар шуда, китобҳои камёбу камшумор фармоиш дода мешаванд. Зеро дар озмун тамоми шаҳрвандони ҷумҳурӣ ширкат меварзанд.
Ҳавасмандии Ҳукумати мамлакат, бавижа Президенти Ҷумҳурии Тоҷикистон муҳтарам Эмомалӣ Раҳмон дар мавриди ҳамагонӣ кардани китобхонӣ боиси хушнудии бепоён аст. Дар ҳақиқат, барои сокинони сайёра воқиф будан аз илму хирад агар амри ногузири рӯзгорашон бошад, дар мо давлату Ҳукумат ҷонибдори бомаърифат кардани раияташ аст.
Мунира НАБОТОВА, омӯзгор
Баёни ақида (0) Санаи нашр: 12.04.2019 №: 71 Мутолиа карданд: 899
