ҳуқуқ
ХИЗМАТИ ҲАРБӢ. НАҚШАИ ДАЪВАТ 36 ДАРСАД ИҶРО ШУД
Аз даъвати баҳории шаҳрвандон ба сафи Қувваҳои Мусаллаҳи Ҷумҳурии Тоҷикистон даҳрӯзаи дуюм оғоз гардид. Дар ин муддат иҷрои нақшаи ин маъракаи муҳими сиёсӣ дар ҷумҳурӣ 36 дарсадро ташкил медиҳад.
Бино ба иттилои Ориф Нозимиён, сардори маркази матбуоти Вазорати мудофиа аз аввали моҳи апрели соли ҷорӣ чорабиниҳои даъватии шаҳрвандон ба хизмати ҳатмии ҳарбӣ дар тамоми шаҳру навоҳии мамлакат муташаккилона ва дар сатҳи зарурӣ давом дорад. Дар миёни вилоятҳо ва шаҳру навоҳии мамлакат ВМКБ аз ҳама пешсаф буда, дар нахустин рӯзҳои даъват нақшаро 106 дарсад иҷро кард. Дар вилояти Суғд иҷрои нақша 35 дарсад, ноҳияи Кӯҳистони Мастчоҳ, аллакай аз иҷрои пурраи нақша гузориш додааст. Дар вилояти Хатлон иҷрои нақша 32 дарсадро ташкил дод. Ба ҳамин тартиб, иҷрои нақшаи комиссариатҳои ҳарбии ноҳияҳои тобеи ҷумҳурӣ ва шаҳри Душанбе ба 36 дарсад баробар шудааст.
Ба гуфтаи масъулони Вазорати мудофиа, дар рӯзҳои аввали даъват ба таври ихтиёрӣ ҳозир гардидани ҷавонон ба комиссариатҳои ҳарбӣ нишон медиҳад, ки ташкилу гузарондани чорабиниҳои пеш аз даъватӣ, корҳои фаҳмондадиҳӣ, дарки масъулияти хизмати ҳарбӣ, шаъну шарафи он ва дар таваҷҷуҳ бо хизматчиёни ҳарбӣ ба роҳ мондани ҳамкории доимӣ аз ҷониби сохтору идораҳои масъули даъватӣ ва намояндагони ҳамаи қишрҳои ҷомеа амали басо ҳам зарурӣ буда, метавонад омили сари вақт иҷро шудани нақшаи даъват дар ҷумҳурӣ гардад.
Ёдовар мешавем, ки мавсими даъвати баҳории шаҳрвандон ба сафи Қувваҳои Мусаллаҳи Ҷумҳурии Тоҷикистон 1 апрели соли ҷорӣ оғоз гардида, то охири моҳи май идома меёбад.
Лашкар ШАРИФ, «Ҷумҳурият»
Баёни ақида (0) Санаи нашр: 12.04.2019 №: 71 Мутолиа карданд: 818
