ҳуқуқ
ҲАЛНОМАИ СУД. САРКАШӢ ҶАВОБГАРӢ ДОРАД!
Суди шаҳри Ваҳдат дар маҷлиси кушоди судӣ шаҳрванд Фирӯзҷон Сафаровро, ки қаблан низ суд шудааст, барои барқасдона, яъне бидуни сабабҳои узрнок, саркашӣ намудан аз иҷрои қарори суд оид ба пардохти маблағ барои таъминоти фарзанди ноболиғ ба курсии айбдорӣ шинонд.
Судшаванда 5 октябри соли 2012 бо шаҳрванд Мастура Сафарова оиладор шуда, баъд аз соҳиби як фарзанд гардидан моҳи марти соли 2015 муносибати оилавиашон қатъ мегардад. Дар асоси ҳалномаи суд аз ҳисоби судшаванда ба фоидаи ҷабрдида барои таъминоти фарзандашон ба тариқи устувор ҳар моҳ, то ба синни балоғат расидан ба андозаи 160 сомонӣ, алимент рӯёнда шуда, инчунин, то синни сесолагӣ барои таъминоти ҳамсар дар асоси ҳамин ҳалномаи суд маблағи 60 сомонӣ алимент муқаррар кардааст.
Ф. Сафаров дидаву дониста, ки иҷроиши ҳалномаи судӣ аз ҷониби ӯ ҳатмӣ мебошад, онро сарфи назар намуда, 1 солу 3 моҳ қасдан ҳалномаи судро иҷро накарда, ба собиқ ҳамсараш маблағ барои таъминоти фарзандаш насупурдааст, ки дар маҷмӯъ, 2400 сомониро ташкил медиҳад.
Пеш аз оғози тафтишоти судӣ аз ҷониби Ф. Сафаров дархости хаттӣ ворид гардид, ки дар он худашро бо айби ба ӯ эълоннамудаи тафтишоти пешакӣ пурра гунаҳгор ҳисобида, аз гуноҳи содирнамудааш сидқан пушаймон аст.
Баъд аз анҷоми тафтишот суд Фирӯзҷон Сафаровро дар содир намудани ҷиноят бо моддаи 177 (бадқасдона саркашӣ намудани падару модар аз таъминоти фарзандон) - и Кодекси ҷиноятии Ҷумҳурии Тоҷикистон гунаҳгор дониста, нисбат ба ӯ ҷазо дар намуди маҳрум сохтан аз озодӣ ба муҳлати 8 моҳ бо адо намудани ҷазо дар колонияи ислоҳии дорои низомаш умумӣ, таъйин кард. Ҳамчунин, дар асоси ҳукми суд маҳкумшуда уҳдадор гардид, ки маблағи зарари расондашуда дар ҳаҷми 2400 сомониро ба фоидаи ҷабрдида Мастура Сафарова пардохт намояд.
Б. ХОЛИҚЗОДА, судяи суди шаҳри Ваҳдат
Баёни ақида (0) Санаи нашр: 16.02.2019 №: 72 Мутолиа карданд: 1492
