ҳуқуқ
ҶИНОЯТ ва ҶАЗО
НАШЪАҶАЛЛОБ
10 сол паси панҷара рафт
Суди вилояти Хатлон шаҳрванд Муниршоҳ Ибодовро бар асоси моддаи 200 қисми 3 банди «а» - и Кодекси ҷиноятии Ҷумҳурии Тоҷикистон гунаҳкор дониста, ӯро ба муҳлати 10 сол аз озодӣ маҳрум кард.
Маркази матбуоти Прокуратураи генералии Ҷумҳурии Тоҷикистон бо нашри ин хабар навиштааст: «Муниршо Ибодов ба муомилоти маводи нашъадор машғул шуда, барои ба даст овардани фоида дар шаҳри Бохтари вилояти Хатлон ба шахси ба мақомоти корҳои дохилӣ мусоидаткунанда бо номи шартии «Тӯра» 30,9 грамм маводи нашъадори навъӣ афюнро фурӯхта, дар ҷои ҳодиса дастгир шуд».
Моддаи 200 - и Кодекси ҷиноятӣ ҷавобгарӣ барои муомилоти ғайриқонунии воситаҳои нашъадор ё моддаҳои психотропӣ бо мақсади ба соҳибияти каси дигар доданро пешбинӣ мекунад, ки М. Ибодов дар ҳолати такрорӣ (банди «а») ба ин амал даст задааст.
РАШК
сабаби ҷиноят
Кормандони мақомоти милитсия дар ноҳияи Ҷаббор Расулови вилояти Суғд зани 38 - солаеро боздошт намуданд, ки бар асари рашк ҳамсарашро бо зарбаи корд маҷрӯҳ кардааст.
Тиқби иттилои маркази матбуоти Вазорати корҳои дохилӣ: «номбурда, 8 апрели соли ҷорӣ дар ҳавлии истиқоматиашон аз сабаби рашк бо шавҳараш, марди 37 - сола ҷангу ҷанҷол намуда, бо корд як маротиба ба қафаси синааш задааст». Дар натиҷа ҳамсараш ҷароҳати вазнини ҷисмонӣ бардошта, дар беморхона бистарӣ гардидааст.
Айни ҳол, нисбат ба ин зан бо моддаи 120 (таҳдиди куштан ё расондани зарари вазнин ба саломатӣ) - и Кодекси ҷиноятии Ҷумҳурии Тоҷикистон парвандаи ҷиноятӣ оғоз шуд.
РИШВА
ин навбат устоди донишгоҳро ба ҷавобгарӣ кашид
Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз ошкор шудани як ҳолати ришваситонӣ аз ҷониби Алиҷон Набиҷонов, омӯзгори риштаи тарбияи ҷисмонии Донишгоҳи давлатии Хуҷанд ба номи академик Бобоҷон Ғафуров, хабар дод.
Бино ба иттилои манбаъ, омӯзгор бо истифода аз мақоми хизматӣ ба боварии шаҳрванд Р. Мамуров даромада, аз ӯ барои ба Донишкадаи омӯзгории шаҳри Панҷакент дохил намудани ҷиянаш Ҷ. Салимов ва дар оянда интиқол додан ба Донишгоҳи давлатии Хуҷанд ба номи академик Б. Ғафуров 1600 доллари амрикоӣ гирифтааст.
Ҳоло нисбат ба Алиҷон Набиҷонов бо моддаи 247 қисми 3 банди «а» (қаллобӣ ба миқдори калон) - и Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, тафтишоти пешакӣ идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 22.04.2019 №: 76 Мутолиа карданд: 834
