Дар Маркази тадқиқоти стратегии назди Президенти Ҷумҳурии Тоҷикистон зимни  баргузории конфронси илмию амалӣ бо иштироки васеи роҳбарону намояндагони вазорату идораҳо, муассисаҳои олии таълимӣ ва марказҳои татбиқи лоиҳаҳо ҷанбаҳои стратегии рушди иҷтимоию иқтисодии минтақаҳои кишвар мавриди таҳлилу баррасӣ қарор гирифтанд.

Зикр гардид, ки ба шарофати сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати рушди иқтисодию иҷтимоии кишвар ва таъмини зиндагии шоистаи мардум бо истифода аз имконияту захираҳо  заминаҳои боэътимоди тараққиёти соҳаҳо гузошта шудаанд. Ҳамин аст, ки танҳо соли гузашта дар доираи татбиқи 1850 лоиҳа 47 миллиард сомонӣ сармоя ҷалб гардид. Маблағҳои воридшуда бештар барои рушди соҳаҳои кишоварзӣ, обёрӣ, энергетика, саноат, нақлиёт, сайёҳӣ, маорифу тандурустӣ сарф карда мешаванд.   Ҳоло аз модели аграрӣ – индустриалии иқтисод гузаштан ба  индустриалӣ – аграрӣ  яке аз ҳадафҳои асосии рушд қарор ёфтааст. Дар ин замина Стратегияи миллии рушди Ҷумҳурии Тоҷикистон барои давраи то соли 2030, барномаҳои миёнамуҳлати фарогири ҳамаи ҷанбаҳои ҳаёти мардум ва рушди иҷтимоию иқтисодии шаҳру ноҳияҳои кишвар амал менамоянд. Аммо татбиқи ҳамаи тадбирҳои роҳандозишуда, ки ба рушди минтақаҳо равона гардидааст, дар ҳолати  ҳамоҳанг сохтани фаъолияти вазорату идораҳо ва мақомоти иҷроияи маҳаллии ҳокимияти давлатӣ имконпазир аст.
- Бисёр масъалаҳои печидаи иҷтимоию иқтисодӣ, ки пешрафти ҷомеа ба онҳо марбут аст, танҳо бар асоси кори якҷояи ташкилоту муассисаҳо ва вазорату кумитаҳо ҳалли пурраи худро хоҳанд ёфт. Ҳолатҳои сари вақт амалӣ нагардидани баъзе ҳадафҳои гузошташуда дар ҷодаи рушди иқтисодию иҷтимоии минтақаҳо аз бетарафии бархе масъулони вазорату идораҳо нисбат ба соҳаи фаъолияти ҳамдигар сарчашма мегирад. Бинобар ин, роҳандозии  консепсияи мушаххаси миллии рушди минтақаҳо мувофиқи мақсад аст, - изҳор дошт Саидраҳмон Назризода, корманди раёсати тадқиқоти масъалаҳои соҳавии МТС.
Иштирокдорони ҳамоиш, ҳамчунин, масъалаҳои мубрами рушди минтақаҳо, дастгирии  соҳибкорони маҳаллӣ, таъсиси ҷойҳои нави кор, истифодаи самараноки захираю имкониятҳои сайёҳӣ, зеҳнию меҳнатӣ ва  баланд бардоштани сатҳу сифати хизматрасониро баррасӣ намуда, барои дарёфти роҳи ҳалли онҳо пешниҳодҳои судманд манзур доштанд.

Ташрифулло САЪДУЛЛОЕВ,
«Ҷумҳурият»