иқтисод
АШТ. СОДИРОТИ 1260 ТОННА ЗАРДОЛУ БА ХОРИҶА
Боғдорони ноҳияи Ашт бо оғози ҷамъоварии ҳосили нав тавонистанд ба маблағи беш аз 250 ҳазор доллари амрикоӣ ба хориҷи кишвар - Россия, Қазоқистон ва Беларус зиёда аз 1200 тонна зардолуи тару тозаи ҷавобгӯ ба талаботи стандартҳои байналмилалӣ содирот намоянд. Фаровонҳосилии бесобиқа дар пайи ба самар расидани боғҳои нав даст дод.
Бунёди боғҳои нав шароит фароҳам овард, ки солҳои наздик ноҳия дар миқёси кишвар ба содироткунандаи асосии зардолу ва гелос табдил ёбад. Дар ноҳия барномаи рушди соҳаи боғдорӣ барои солҳои 2016-2020 қабл аз муҳлат иҷро шуда, зиёда аз 1000 гектар боғҳои нави замонавӣ бунёд гардиданд.
Сарвари давлат муҳтарам Эмомалӣ Раҳмон дар ҳар сафари кории худ ба ин ноҳия Аштро макони меваҳои шаҳдбор унвон карда, бо истифода аз шароиту имконоти мавҷуда кишоварзонро ба рушди бемайлони соҳаи боғдорӣ ҳидоят месозанд, ҳамзамон, таъкид мекунанд, ки дар баробари васеъ кардани майдони боғу токзори замонавии бо такя ба технологияи интенсивию суперитенсивӣ бунёдшуда ва истеҳсоли меваи фаровон ба коркарди ниҳоии он - истеҳсоли шарбату консервҳо аҳамияти ҷиддӣ дода, ҷойҳои нави корӣ таъсис диҳанд. Қаблан бунёди боғҳо дар ноҳия дар заминаи майдонҳои обӣ ҷараён дошт ва дар ҳар мавсим ҳамагӣ 10 - 15 гектар боғ бунёд мешуд. Ҳоло бунёди боғу токзорҳо, асосан, аз ҳисоби заминҳои талу теппаҳо ба роҳ монда мешавад. Дехқонон бо дарёфти сарчашмаҳои дигари обёрӣ - кофтани чоҳҳои амудӣ дар масоҳати калон дар талу теппаҳо, ки қисмати зиёди ҳудуди ноҳияро ташкил медиҳанд, боғ бунёд мекунанд.
Бино ба иттилои Рафтор Муҳаммадиев, сардори раёсати кишоварзӣ, имрӯз дар ноҳия 17 ҳазор гектар боғ мавҷуд буда, 8,5 ҳазор гектари он ба самар расидааст. Рӯзҳои наздик дар ноҳия ҷамъоварии оммавии гелос, ки ғолибан аҳамияти содиротӣ дорад, шурӯъ хоҳад шуд.
Рушди боғдорӣ ба ҳаллу фасли масъалаи муҳими иҷтимоӣ - таъсиси ҷойҳои нави корӣ мусоидат мекунад. Дар мавсими ҷамъоварии мева то 10 - 12 ҳазор сокини маҳаллӣ бо кори мавсимӣ ва маоши хуб таъмин мешавад.
Ҷовиди АШТӢ, «Ҷумҳурият»
Баёни ақида (0) Санаи нашр: 29.05.2019 №: 102 Мутолиа карданд: 888
