иқтисод
ПАСАНДОЗ ЯГОНА МУТТАКОЯМ БУД, АММО…
Пас аз фавти шавҳарам (соли 2009) таъминоти оила пурра ба дӯшам афтод. Меҳнат карда, баробари хӯрондану пӯшондани фарзандонам як қисми маблағҳоро барои касбомӯзии онҳо дар филиали ҶСК «Агроинвестбонк» дар шаҳри Панҷакент пасандоз намудам. Фарзандонам яке пайи дигар донишҷӯ шуданд. Ҳоло Наргис Ҳабибзода донишҷӯи курси сеюми Донишгоҳи байналмилалии «АТАТЮРК– АЛАТТО» - и Ҷумҳурии Қирғизистон ва Далер Ҳабибзода донишҷӯи курси якуми филиали Донишгоҳи омӯзгории Тоҷикистон ба номи С. Айнӣ дар шаҳри Панҷакент мебошанд. Ҳарду тариқи шартнома таҳсил менамоянд.
Мутаассифона, ҳоло бонк пули пасандозамро намедиҳад, то маблағи шартномаи таҳсили фарзандонамро пардохт намоям. Чандест, ки аз донишгоҳҳои номбурда барои таъхири пардохти маблағи мазкур ба унвони ман огоҳинома мефиристанд. Дар он зикр мегардад, ки дар ҳолати напардохтани маблағи ҳаққи таҳсил фарзандонам аз донишгоҳ хориҷ карда мешаванд. Вале, бо вуҷуди муроҷиатҳои пай дар пай, масъулини «Агроинвестбонк» танҳо ваъдаҳои хушку холӣ медиҳанд. Ман аз баҳри фоидаи пасандоз гузаштаму танҳо маблағи худамро гирифтан мехоҳам. Аммо роҳбарияти бонк ҳамон пули гузоштаамро барнамегардонад.
Аввали соли гузашта ба Бонки миллии Тоҷикистон барои бозпас гирифтани маблағҳои дар бонки «Агроинвестбонк» доштаам муроҷиат намудам. Аммо ҳайҳот, ки масъулини ин ниҳод низ ба ҷуз маслиҳат ёрие надоданд. Дар посухи бонк зикр гардидааст, ки ҷиҳати ситондани маблағҳои гузоштаам ба суд муроҷиат намоям. Вале даъвоҳои судӣ то кадом андоза дар ҳалли масъала мусоидат менамоянд, номаълум аст. Ин амал баробари мушкили ба сари фарзандонам омада ташвишҳои маро бештар менамояду халос.
Умед дорам, ки бо хондани ин матлаб дар рӯзномаи «Ҷумҳурият» шахсони масъул ба хотири рафъи мушкилоти ба сари ману фарзандонам омада чораи зарурӣ меандешанд.
Баҳринисо РАШИДЗОДА, сокини шаҳри Панҷакент
Баёни ақида (0) Санаи нашр: 24.06.2019 №: 118 Мутолиа карданд: 1340
