ҳуқуқ
ҶИНОЯТ ва ҶАЗО
ПАРВАНДАИ ҶИНОЯТӢ
барои дуздии 146 085 сомонӣ пули барқ
Агентии назорати давлатии молиявӣ ва мубориза бо коррупсия алайҳи Сайҷамол Мираков, муовини ҶСК «Шабакаҳои барқии ноҳияи Рӯдакӣ» оид ба фурӯши барқ, бар асоси моддаи 245 қисми 4 Кодекси ҷиноятӣ (азонихудкунӣ ё исрофкорӣ ба миқдори махсусан калон) парвандаи ҷиноятӣ оғоз намудааст.
Маркази матбуоти агентӣ хабар медиҳад, ки номбурда 15 октябри соли 2018 дар ду ҳолат аз шахсони масъули ҶДММ «Мавлонои Румӣ» 152000 сомонӣ пардохти ҳаққи истифодаи қувваи барқро қабул намуда, тавассути мошинаи хотираи фискалӣ ба намояндагони ширкати мазкур расидҳои пардохт медиҳад. Аз ин маблағ, ки ба таври нақд гирифтааст, 5915 сомонӣ ба бонк пардохта, 146 085 сомониро ба ҷайби худ задааст.
Моддаи 245 қисми 4 Кодекси ҷиноятӣ ҷазо дар намуди ҷарима ба андозаи аз як ҳазору чорсаду шаст то ду ҳазору яксаду навад нишондиҳанда барои ҳисобҳо ё маҳрум сохтан аз озодӣ ба муҳлати аз ҳашт то дувоздаҳ сол бо мусодираи молу мулкро пешбинӣ мекунад.
ТАҲДИДИ КУШТАН
Гумонбар ба даст афтод
Мақомоти корҳои дохилӣ ба тафтиши амали марди 36 - солае пардохтанд, ки дар шаҳри Душанбе як сокини ноҳияи Ванҷро таҳдид ба куштан кардааст.
Дар ин бораи сомонаи ВКД хабар дод. Тибқи иттилои манбаъ, ҳодиса 21 июл дар тарабхонаи «Абрикол» - и пойтахт ба амал омадааст. Марди гумонбар ба таҳдиди куштор, ки аз ҷониби кормандони милитсия дастгир шудааст, соати 22:40 дақиқаи ҳамон рӯз дар ҳолати мастӣ бо истифодаи корди хоҷагӣ ба сокини ноҳияи Ванҷ дарафтода, ӯро захмӣ намудааст.
Боздоштшуда сокини ноҳияи Рӯдакӣ буда, ҳоло аз рӯи ин ҳодиса тафтишот давом дорад.
Сокини шаҳри Ҳисор хонаеро дар Қубодиён ғорат кард
Як сокини шаҳри Ҳисор, ки маркази матбуоти ВКД аз ӯ ҷавони 20 - сола ном мебарад, дар деҳаи Навободи ноҳияи Қубодиён даст ба дуздӣ задааст.
Дар ин бора зани 61 – солаи ноҳияи Қубодиён ба ШВКД дар ноҳия арз карда, изҳор доштааст, ки нимаи аввали рӯзи 23 июли соли ҷорӣ шахсони номаълум бо роҳи пинҳонӣ ба хонаи истиқоматиаш даромада, аз дохили сандуқ 50 000 сомониро дуздида, аз ҷойи ҳодиса ғайб задаанд. Дар пайи аризаи ин зан мақомоти милитсия чорабиниҳои фаврӣ – ҷустуҷӯӣ гузаронда, шахси гумонбар ба дуздиро боздошт намуданд, ки ҳоло тафтишоти ҳодисаи мазкур идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 25.07.2019 №: 142 Мутолиа карданд: 1202
