иқтисод
БУНЁДКОРӢ. ИҚДОМЕ, КИ ДАР НОҲИЯИ ШАМСИДДИНИ ШОҲИН АВЛАВИЯТ ДОРАД
Сокинони ноҳияи Шамсиддини Шоҳин, ки аз азал ҳамчун мардуми бонангу ор ва шуҷову ватанпарвар шинохта шудаанд, имрӯз дар радифи дигар навоҳии кишвар ба истиқболи Ҷашни 30 – солагии Истиқлолияти давлатии Ҷумҳурии Тоҷикистон омодагии сазовор дида истодаанд. Онҳо талош доранд, ки ноҳияро бо бунёди иншооти наву замонавӣ боз ҳам зеботару ободтар намоянд.
То 1 июли соли 2019 ба маблағи 42 миллиону 259 ҳазор сомонӣ сохтмони иншооти гуногуни ҷашнӣ, аз ҷумла меҳмонхона, бунгоҳи тиббӣ ва кашидани хати оби ошомиданӣ ба масофаи 8 километр дар деҳаи Қавоқ, коргоҳҳои дӯзандагӣ ва коркарди мева бо 100 ҷои корӣ дар деҳаи Ҷавонон, дорухона дар деҳаи Хирманҷо, мактаб – интернат дар деҳоти Даштиҷум, муассисаи таҳсилоти миёнаи умумии № 9 барои 144 ҷои нишаст дар деҳаи Девдор, беморхонаи қитъавӣ барои 24 кат дар деҳаи Чагам ва хати барқ дар маҳаллаи навбунёди деҳаи Хайркорон, ба охир расида, айни ҳол онҳо мавриди баҳрабардорӣ қарор доранд.
- Дар маҷмӯъ, давоми 28 соли Истиқлолияти давлатӣ дар маркази ноҳия даҳҳо биною иншооти иҷтимоию иқтисодӣ ва фарҳангӣ бунёд ёфта, ҳусни деҳоту шаҳрак ба куллӣ дигаргун шуд, - гуфт зимни суҳбат раиси ноҳия Зарифзода Почохон.
Бино ба иттилои мавсуф, Шамсиддини Шоҳин ноҳияи аграрӣ аст ва масъулони бахши кишоварзӣ барои таъмини амнияти озуқаворӣ тадбирҳои муассир меандешанд. Бахши кишоварзии ноҳия тайи солҳои охир хуб рушд карда, дастовардҳои назаррасу хурсандибахшро соҳиб шудааст. Таъмини бозорҳои истеъмолии ноҳия бо сабзавоту меваҷоти истеҳсоли дохилӣ шоҳиди гуфтаҳои мо шуда метавонад. Соли 2018 дар ҳама бахшҳои хоҷагидорӣ 27584 тонна ғалладона, 5074 тонна картошка, 203 тонна зағир, 2316 тонна сабзавот ва 2352 тонна полизӣ истеҳсол карда шуд.
Бино ба иттилои сартабиби беморхонаи марказии ноҳия Аҳмадҷон Дӯстов, дар ноҳия беморхонаи марказӣ, 95 маркази саломатӣ, 19 бунгоҳи тиббӣ, инчунин, марказҳои иммунизатсия, СПИД – ВНМО, тропикӣ ва зидди бемории сил фаъолият мекунанд, ки дар онҳо зиёда аз 340 нафар табибони дорои маълумоти олию миёнаи тиббӣ ба мардум хизмат мерасонанд.
Дар ноҳия 32 муассисаи фарҳангӣ, аз ҷумла 5 хонаи фарҳанг, 7 клуби деҳот, боғи фарҳангию фароғатӣ, мактаби бачагонаи санъат ва 17 китобхонаи деҳот (бо теъдоди умумии зиёда аз 70 ҳазору 250 нусха китоб), фаъолият дорад. Мактаби бачагонаи санъати мусиқӣ аз соли 2006 инҷониб фаъолият мекунад ва дар он 36 нафар омӯзгорон ба 140 нафар хонандагон асосҳои навозиши асбобҳои халқӣ - доира, таблак, дутор, рубоб, ғижак, най, нозукиҳои рақс, овозхонӣ, рассомӣ, назарияи мусиқӣ, инчунин, ҳунарҳои мардумии чакандӯзиву гулдӯзӣ ва кор бо компютерро меомӯзонанд. Муваффақияти калони ин соҳа эъмори бинои нави қасри фарҳанг дар ноҳия мебошад, ки бо дастгирии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бунёд ёфта, имсол мавриди баҳрабардорӣ қарор гирифт. Ин бинои муҳташами фарҳангӣ дорои 455 ҷои нишаст буда, бо маблағи зиёда аз 5 миллион сомонӣ сохта шудааст.
Холназар КАСИРОВ,
«Ҷумҳурият»
Баёни ақида (0) Санаи нашр: 29.07.2019 №: 144 Мутолиа карданд: 1078
