сиёсат
ҚАБУЛИ ЭЪТИМОДНОМА АЗ САФИРОНИ НАВТАЪЙИН
31 июл дар Қасри миллат Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз сафирони навтаъйини як қатор давлатҳои хориҷӣ дар Ҷумҳурии Тоҷикистон эътимоднома қабул намуданд.
Ба Президенти Ҷумҳурии Тоҷикистон муҳтарам Эмомалӣ Раҳмон сафирони фавқулода ва мухтори Ҷумҳурии Қазоқистон Аскар Таджибаев, Ҷумҳурии Ҳиндустон Вираҷ Сингҳ, Ҷумҳурии Исломии Покистон Имрон Ҳайдар, Шоҳигарии Британияи Кабир ва Ирландияи Шимолӣ Меттю Лоусон, Гурҷистон Зураб Абдушелишвили, Ҷумҳурии Корея Кан Ҷе - квон, Босния ва Герсеговина Самир Веладзик, Ҷумҳурии Колумбия Алфонсо Лопес Кабалйеро, Австралия Грейм Михан ва Ҷумҳурии Федеролии Демократии Эфиопия Гирма Тамесген Баркесса ба таманниёти неку шодбошии роҳбарони давлатҳояшон эътимоднома супурданд.
Сарвари давлат муҳтарам Эмомалӣ Раҳмон ҳамаи онҳоро барои оғози иҷрои вазифаи сафири давлатҳои худ дар Тоҷикистон табрику таҳният гуфта, изҳори умеду бовар намуданд, ки дар фаъолияти самараноки дипломатии худ ба рушду таҳкими минбаъдаи муносибатҳои дӯстона ва ҳамкориҳои судманду гуногунҷанба байни Тоҷикистон ва кишварҳояшон ҳамаҷониба мусоидат менамоянд.
Таъкид гардид, дар Тоҷикистон, аз рӯзҳои нахустини соҳибистиқлолӣ, сиёсати фаъоли хориҷии "дарҳои боз" пеш гирифта шуда, барои рушду тавсеаи ҳамкориҳои мутақобилан судманди сиёсӣ, иқтисодию иҷтимоӣ ва фарҳангиву гуманитарӣ, бо доираи васеи ҷомеаи ҷаҳонӣ, кӯшишҳои пайваста ба харҷ дода мешавад.
Изҳори итминон карда шуд, ки сафирони навтаъйин дар иҷрои вазифаи сермасъулияти сафирӣ бо Тоҷикистон, шиносоии бештару наздик пайдо карда, дар таҳкими равобити дӯстонаи байнидавлатӣ саҳми арзанда мегузоранд.
Баёни ақида (0) Санаи нашр: 01.08.2019 №: 146 - 147 Мутолиа карданд: 933
