иқтисод
РУШДИ ДЕҲОТ. СОҲИБКОРОН КАМАРИ ҲИММАТ МЕБАНДАНД
Ба истиқболи Ҷашни 30 - солагии Истиқлолияти давлатии Ҷумҳурии Тоҷикистон ва эълон гардидани Солҳои рушди деҳот, сайёҳӣ ва ҳунарҳои мардумӣ соҳибкорони зиёд дар шаҳру ноҳияҳои кишвар дар арсаи созандагию ободкорӣ корнамоиҳо нишон медиҳанд.
Соҳибкор Давлатбек Давлатов аз деҳаи Заркамари Ҷамоати деҳоти Мискинободи ноҳияи Файзобод таъмиру навсозии бозори ноҳияро ба анҷом расонд. Ин бозор «Истиқлол» ном дошта, солҳои тӯлонӣ дар ҳолати валангор қарор дошт. Онро соҳибкор таъмир карда, ба бозори замонавӣ табдил дод. Давлатбек Давлатов дар бозор ду чойхона, ду дорухона, панҷ мағоза ва меҳмонхона барои бист нафарро бо шароитҳои зарурӣ сохта, ба истифода супурд. Ҳамчунин, ӯ дар арафаи ҳама иду ҷашнҳо ба оилаҳои камбизоат, пирони барҷомонда ва собиқадорони ҷангу меҳнат ёрӣ мерасонад. Соҳибкор ҳоло тасмим гирифтааст, ки дар соли нави хониш хонандагон аз оилаҳои камбизоатро бо асбоби хониш ва либосу пойафзол таъмин намояд.
Бибираҷаб Катаева аз деҳоти Қазноби шаҳри Роғун намунаи афроди хайрхоҳу ободгар аст. Ӯ ба ифтихори Ҷашни 30 – солагии Истиқлолияти давлатии Ҷумҳурии Тоҷикистон ва Солҳои рушди деҳот, сайёҳӣ ва ҳунарҳои мардумӣ ба маблағи 500 ҳазор сомонӣ аз ҳисоби худ дар деҳоти Қалъаи Нави шаҳр бозори фурӯши чорворо бунёд намуд. Ҳоло рӯзҳои шанбею якшанбе дар ин ҷо фурӯши чорво ба роҳ монда мешавад ва аз гӯшаю канори кишвар тоҷирону соҳибкорон ҷамъ меоянд. Зани соҳибҳунару меҳнатдӯст барои истироҳати мардум дар назди чашмаи овозадори «Қалъаи Нав» ошхона, чойхона ва мағозаи молҳои рӯзгорро ифтитоҳ намуд, ки айни замон дар хизмати мардум қарор доранд. Бибираҷаб Катаева, иброз намуд, ки дар остонаи истиқбол аз 28 – умин солгарди Истиқлолияти давлатӣ ба даҳ оилаи камбизоату бесаробон кумаки хайрия мерасонад.
Боиси хушнудист, ки эҳсоси ватандӯстии соҳибкорони мамлакат рӯз ба рӯз боло мегирад ва онҳо ба иқдомҳои созанда даст мезананд. Ҳоло чунин иқдомҳои соҳибкорон боиси равнақ ёфтани корҳои ободонию бунёдкорӣ гардидаанд.
Ҳокими САФАР, рӯзноманигор
Баёни ақида (0) Санаи нашр: 15.08.2019 №: 156 Мутолиа карданд: 1403
