сиёсат
МУЛОҚОТИ ЭМОМАЛӢ РАҲМОН БО ҶИН ЛИЧУН
19 август Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Қасри миллат президенти Бонки осиёии сармоягузориҳои инфрасохторӣ Ҷин Личунро ба ҳузур пазируфтанд.
Тавре таъкид гардид, наздик ба панҷ сол аст, ки Бонки осиёии сармоягузориҳои инфрасохторӣ дар сармоягузории лоиҳаҳои сершумор дар самти бунёди инфрасохтор дар кишварҳои Осиё саҳм гузошта, барои Тоҷикистон низ шарики боэътимоди рушд ба ҳисоб меравад.
Доир ба ҳамкориҳои судманди Тоҷикистон ва бонки мазкур дар самти маблағгузории лоиҳаҳои сармоягузорӣ, аз ҷумла дастгирии лоиҳаҳои «Беҳтар намудани ҳолати роҳи автомобилгарди минтақавии Душанбе – Турсунзода – сарҳади Ҷумҳурии Ӯзбекистон» ва «Таҷдиди Неругоҳи барқи обии Норак, марҳилаи 1” фикру мулоҳизаҳои судманд баён гардид ва изҳори итминон шуд, ки лоиҳаҳои дигари муштараки сармоягузорӣ дар соҳаҳои роҳу нақлиёт, энергетика ва дигар соҳаҳои афзалиятнок аз ҷониби бонк дар оянда низ дастгирӣ ёфта, сармоягузорӣ мегарданд.
Ҷонибҳо доир ба ҳамкориҳои минбаъдаи Тоҷикистон ва Бонки осиёии сармоягузориҳои инфрасохторӣ, ки дар заминаи ҳадафҳои стратегӣ ва ташаббусҳои байналмилалии Тоҷикистон дар соҳаи обу энергетика ва экология таҳия ва амалӣ мегарданд, табодули афкор намуданд.
Дар мулоқот, ҳамчунин, дигар мавзӯъҳои мавриди таваҷҷуҳи тарафҳо баррасӣ шуданд.
Баёни ақида (0) Санаи нашр: 18.08.2019 №: 158 Мутолиа карданд: 1249
