иқтисод
ИДИ СЕБ. АМРЕ, КИ ОЯНДАСОЗ АСТ
Амри Президенти Ҷумҳурии Тоҷикистон аз 17 август доир ба ҳамасола ҷашн гирифтани Иди ангур ва Иди себ мо - боғу токпарварони кишварро шоду рӯҳбаланд намуд. Солҳои охир ба шарофати дастгирию ғамхориҳои Сарвари давлат муҳтарам Эмомалӣ Раҳмон ва қабули барномаҳои вижаи Ҳукумати мамлакат соҳаи боғдории ҷумҳурӣ рушду равнақи тоза ёфтааст. Мардум бо меваҳои фаровону болаззат таъминанд ва бозори содирот низ гарм шудааст. Муаррифии дастовардҳо барои ҷалби хориҷиён, сайёҳон ва ҳамватанони бурунмарзӣ ба ин кори пурфайзу бобаракат нақши муҳим дорад.
Ҳамагон медонанд, ки Тоҷикистон ватани себ ва ин меваи шаҳдбори диёр дар бозори ҷаҳонӣ серхаридор мебошад. Ҳамасола бо як тантанаи хос барпо намудани Иди себ басо рамзию ифтихорӣ ва айни замон амри зарурист. Ин ташаббус мақому манзалати боғпарварию токпарвариро боз ҳам баланд бардошта, ба пешрафти кор мусоидат менамояд.
Имрӯзҳо бо дастгирии давлату Ҳукумати ҷумҳурӣ кишоварзони варзидаи кишвар заминҳои санглоху талу теппаҳоро ба боғистонҳо табдил дода истодаанд. Дар ин маврид ба андозаи зарурӣ қадр намудани заҳмату дастовардҳои боғдорону токпарварон ва олимони соҳа ба онҳо барои пешбурди корашон рӯҳу илҳоми тоза мебахшад. Баргузории намоишҳою гуфтугӯи васеи боғдорон аз ҳар гӯшаю канори кишвар ва мутахассисони соҳа имконият медиҳад, ки онҳо аз таҷрибаи ҳамдигар баҳра бардоранд. Агар ба ин чорабиниҳо намояндагони сохторҳои дахлдор, вакилони парлумон ва соҳибкорони ватанию хориҷӣ ҷалб карда шаванд, ҳар мушкили ҷойдошта сари вақт ҳалли худро меёбад. Ҳамчунин, дастовардҳои соҳаи боғу токпарварии мамлакат ба ин васила бештар тарғиб гардида, таваҷҷуҳи тоҷирони хориҷӣ ба он бештар мешавад. Навъҳои болаззату зебои себҳои Тоҷикистон барои сайёҳон, албатта, ҳайратангезу роғибанд. Муҳимтар аз ҳама, захираҳои генетикии навъҳои маҳаллӣ дуруст ҷамъоварӣ ва барои истифода аз нав омӯхта мешаванд. Яъне тариқи Иди себ мо аз гузаштаи боғдории халқи худ ёдоварӣ намуда, барои оянда заминаи мустаҳкам мегузорем.
Мирзошоҳи АКОБИР, боғпарвар аз ноҳияи Рашт
Баёни ақида (0) Санаи нашр: 22.08.2019 №: 160-161 Мутолиа карданд: 1330
