сиёсат
ИФТИТОҲИ МУАССИСАИ ТАҲСИЛОТИ МИЁНАИ УМУМИИ № 96 ДАР ШАҲРИ ДУШАНБЕ
30 август Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо раиси шаҳри Душанбе Рустами Эмомалӣ дар ноҳияи Синои шаҳри Душанбе муассисаи таҳсилоти миёнаи умумии № 96 - ро, пас аз навсозӣ, мавриди баҳрабардорӣ қарор доданд.
Пешвои миллат бо шароити муассиса шинос шуда, бо хонандагону омӯзгорон аз наздик суҳбат намуданд.
Мактаб аз чор ошёна ва таҳхона иборат буда, барои 1488 хонанда дар ду баст пешбинӣ гардидааст. Иншоот бо сифати баланд ва мутобиқ ба талаботи замони муосир сохта шуда, синфхонаҳо бо дастгоҳ ва таҷҳизоту аёнияти дарсӣ таъмин мебошанд.
Муассисаи таҳсилоти миёнаи умумии № 96 дорои 35 синфхона буда, аз кабинетҳои химия, математика, физика, биология ва дигар ҳуҷраҳои дарсӣ иборат аст. Ҷиҳати гузарондани дарсҳои таълими меҳнат ва омӯзондани касбҳои гуногун дар таълимгоҳ синфхонаҳои алоҳидаи муҷаҳҳази фаннӣ ташкил шудаанд, ки дар онҳо хонандагон дӯзандагӣ, қаннодӣ ва омодасозии ҳар гуна таомҳоро аз худ хоҳанд кард. Ҳамзамон, як синфхонаи дарсҳои компютерӣ ва ҳуҷраҳои алоҳида барои роҳбарияту омӯзгорони таълимгоҳ бунёд гардидааст. Дар баробари синфхонаҳои муҷаҳҳазу замонавӣ, ҳамчунин, муассисаи нав дорои маҷлисгоҳ бо 150 ҷо ва ошхона бо бештар аз 100 ҷо мебошад.
Тавре аснои шиносоӣ маълум гардид, дар муассисаи мазкур, ҳамчунин, барои баргузории дарсҳои тарбияи ҷисмонӣ ва мусобиқаҳои гуногуни варзишӣ шароити зарурӣ фароҳам оварда шудааст. Тамоми синфхонаҳо, роҳравҳо, толорҳо ва ошхонаи таълимгоҳ бо дастгоҳҳои гармидиҳӣ таъмин буда, онҳо ба шабакаи мутамарказонидашудаи гармидиҳӣ пайвастанд. Иншоот дорои хати алоҳидаи барқ ва ду трансформатори пуриқтидор барои таъмини бемамонияти неруи барқ мебошад. Атрофи таълимгоҳ бо дарахтони ороишӣ ва гулу буттаҳои мавсимӣ оро ёфта, пурра майсазор карда шудааст.
Қобили тазаккур аст, ки бинои қаблии муассиса дар ҳолати ногувор қарор дошт ва ба талаботи имрӯза ҷавобгӯ набуд, аз ин рӯ, он таҷдиду навсозӣ шуд. Бо бунёди иншооти нав, мушкилоти чандсолаи омӯзгорону хонандагон дар самти норасоии ҷойи нишаст ва шароити мусоиди таълимӣ ҳалли худро ёфт. Акнун, онҳо метавонанд дар синфхонаҳои барҳавою муҷаҳҳаз ба дарсомӯзӣ машғул гарданд.
Пас аз шиносоӣ бо шароити таълимии муассиса, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар назди омӯзгорон, хонандагон ва аҳли маорифи шаҳри Душанбе суханронӣ карда, ифтитоҳи муассисаи нави таълимиро ба онҳо таҳният гуфтанд.
Пешвои миллат аз хонандагон даъват ба амал оварданд, ки бо истифода аз чунин шароити мусоид ҷиҳати омӯхтани илм, азхудкунии забонҳо ва технологияи нав кӯшиш намуда, ҳамчун насли созанда ба камол расанд.
Таъкид гардид, ки дар арафаи соли нави хониш ифтитоҳи ин таълимгоҳ туҳфаи арзандаи Ҳукумати Ҷумҳурии Тоҷикистон ба хонандагону омӯзгорон буда, солҳои минбаъда низ дар шаҳри Душанбе бунёди иншооти таълимӣ ва муассисаҳои нав дар назар аст, ки марҳила ба марҳила мушкилоти соҳаро дар самти норасоии ҷойи нишаст ҳал хоҳад кард.
Баёни ақида (0) Санаи нашр: 02.09.2019 №: 167-168 Мутолиа карданд: 834
