иқтисод
НОҲИЯИ БОБОҶОН ҒАФУРОВ. БУНЁДКОРИҲО ВУСЪАТИ ТОЗА МЕГИРАНД
Сокинони заҳматпешаи ноҳияи Бобоҷон Ғафуров бо ифтихору сарбаландӣ аз файзи истиқлолият, бақои сулҳу ваҳдат, сиёсати созандаву бунёдкорона ва тадбирҳои ваҳдатофарини Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баҳри ноил шудан ба комёбиҳои баланди меҳнатӣ ва ободониву шукуфоии Ватани азизамон пайваста бо дилгармӣ талош меварзанд.
Зариф Назирӣ, раиси ноҳия, гуфт, ки ҷиҳати омодагии сазовор ба Ҷашни 30 - солагии Истиқлолияти давлатии Ҷумҳурии Тоҷикистон бунёду навсозии 1282 иншоот ба нақша гирифта шудааст. То имрӯз 565 иншоот ба маблағи 121 миллион сомонӣ мавриди баҳрабардорӣ қарор ёфт. Дар доираи ин ҷашни фархунда дар Ҷамоати деҳоти Ҳайдар Усмонов қасри фарҳанг, бинои нави идораи ҷамоат, беморхонаи минтақавӣ ва дар Ҷамоати деҳоти Овчи - Қалъача муассисаи таълимӣ ба истифода дода шуд. Дар муассисаҳои таълимии №34, Ҷамоати деҳоти Хистеварз ва №15, Ҷамоати деҳоти Унҷӣ сохтмони биноҳои нав барои 1000 - нафарӣ хонанда идома дорад.
Дар нимсолаи аввали соли равон аз ҳисоби буҷети вилоятӣ кӯчаи асосии Ҷамоати деҳоти Дадобой Холматов ба масофаи 15 километр пурра мумфарш карда шуд. Ҳамчунин, бо иқдоми сокинон ва фаъолони ноҳия дар ин роҳ хати барқи замонавӣ кашида мешавад. Дар Ҷамоати деҳоти Ҳайдар Усмонов аз ҷониби сокинони ҷамоат иншооти Парчами давлатии Ҷумҳурии Тоҷикистон бо баландии 54 метр сохта, ба истифода дода мешавад. Ин иқдом дар Ҷамоати деҳоти Хистеварз низ дастгирӣ ёфта, сохтмон идома дорад.
Дар доираи амалисозии нақшаи омодагӣ дар маҷмӯъ, 43,1 километр роҳҳои ноҳия пурра мумфарш карда, 48,8 километр хати барқ ва 122,7 километр хати оби нӯшокӣ кашида шуд. То имрӯз дар 3 муассисаи таълимии ноҳия биноҳои иловагӣ бунёд гардида, 2 муассисаи таълимии садамавӣ ва 3 кӯдакистони бекорхобида пурра азнавсозӣ шуданд, ки дар натиҷа барои таълиму тарбия фаро гирифтани 500 кӯдак шароит фароҳам омад.
- Дар ним сол дар ҷамоатҳои дурдасти ноҳия 3 хонаи саломатӣ ва 2 бинои иловагии маркази саломатӣ, 16 нуқтаи хатнакунӣ, 6 шуъбаи таваллуд, 5 толори кошонаи ҳусн, 9 сартарошхона, 35 толор ва майдончаи варзиш бунёд гардида, ҳоло мавриди истифодабарӣ қарор доранд. Танҳо дар нимсолаи аввал, мувофиқи маълумоти оморӣ, 4608 ҷойи кори доимӣ ва мавсимӣ таъсис ёфт, - иброз дошт раиси ноҳия.
Шаҳбоз АБРОР, “Ҷумҳурият”
Баёни ақида (0) Санаи нашр: 02.09.2019 №: 167-168 Мутолиа карданд: 834
