ҳуқуқ
ҶИНОЯТ ва ҶАЗО
ИФРОТГАРОӢ
Маблағгузори террористон 13 сол аз озодӣ маҳрум шуд
Суди шаҳри Ҳисор шаҳрванд Манучеҳр Ҷӯраевро ба далели маблағгузории ҷиноятҳои хусусияти террористидошта 13 сол равонаи зиндон кард.
Дар ин бора маркази матбуоти Прокуратураи генералии Ҷумҳурии Тоҷикистон хабар дода, меафзояд, ки парвандаи ҷиноятӣ нисбат ба М. Ҷӯраевро прокуратураи шаҳри Ҳисор бо моддаҳои 179 қисми 2 банди «б» ва 32 қисми 3, 4011 Кодекси ҷиноятӣ ба анҷом расондааст.
Тибқи иттилои манбаъ, Манучеҳр Ҷӯраев ҳангоми дар хориҷи кишвар қарор доштанаш бо Абумуҳаммад ном аъзои фаъоли ташкилоти террористии ба ном «Давлати исломӣ» шинос шуда, ақидаҳои онҳоро ҷонибдорӣ ва дар ниҳоят шомили ин гурӯҳи террористӣ гардидааст. Тафтишот муайян намудааст, ки ин шахси гумроҳшуда бо мақсади «ба ҷо овардани ҷиҳоди молӣ» ба ҷангиёни гурӯҳи террористии ба ном «Давлати исломӣ» 120 ҳазор рубли русӣ гузарондааст.
ПОРА
Ҷавобгарии се нафар барои ришваситонӣ
Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз оғози парвандаи ҷиноятӣ нисбат ба афроде хабар дод, ки барои барқарор намудани як донишҷӯ (ғолибан хориҷшуда) ба Донишгоҳи технологии Тоҷикистон даст ба амали коррупсионӣ заданд.
Бино ба иттилои сомонаи агентӣ, Мадина Шарипова, назоратчӣ - прапоршики бригадаи «Н» - и Сарраёсати иҷрои ҷазои ҷиноятии Вазорати адлия бо маслиҳати пешакӣ бо шаҳрванд Матлуба Ахмедова ва Раҷабалӣ Сангов, сардори шуъбаи таъминоти ҳуқуқӣ ва котиботи Вазорати маориф ва илми ҷумҳурӣ, аз шаҳрванд «А» барои ба Донишгоҳи технологии Тоҷикистон барқарор намуданаш 1500 доллари амрикоӣ гирифта, байни худ тақсим намуданд.
Ҳоло тафтиши пешакии парвандаи ҷиноятӣ нисбат ба шахсони номбурда бо моддаи 247 қисми 3 банди «а» Кодекси ҷиноятӣ (қаллобӣ ба миқдори калон) идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 24.09.2019 №: 182 Мутолиа карданд: 905
