иқтисод
САНГВОР ВА МАРҲИЛАИ НАВИ РУШД
Дар Сангвор тибқи нақша - чорабиниҳои мақомоти иҷроияи маҳаллии ҳокимияти давлатии ноҳия вобаста ба Ҷашни 30 - солагии Истиқлолияти давлатии Ҷумҳурии Тоҷикистон як қатор иншооти муҳими хоҷагии халқ сохта шудаанд ва дар доираи ин нақша - чорабинӣ бунёди дигар иншоот идома дорад.
Тавре дар суҳбат иҷрокунандаи вазифаи раиси ноҳияи Сангвор Маҳмадшоҳ Давлатзода иттилоъ дод, ба истиқболи 30 - солагии Истиқлолияти давлатии Ҷумҳурии Тоҷикистон дар ноҳия бунёди 77 иншоот ба нақша гирифта шуда, айни замон як қисми онҳо мавриди баҳрабардорӣ қарор гирифтаанд.
Баробари ба даст омадани соҳибистиқлолӣ ноҳияи Сангвор аз нав ташкил ёфт, аз ин рӯ, ҳамқадами истиқлолият мебошад.
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар як баромадашон чунин таъкид намудаанд: «Истиқлолияти давлатии Ҷумҳурии Тоҷикистон дар таърихи халқи тоҷик нодиртарин падидаи сиёсиву сарнавиштсоз мебошад. Ин рӯз барҳақ, оғози давраи комилан нав дар таърихи давлатдории тоҷикон, марҳалаи тоза дар ташаккулу тафаккур ва фалсафаи давлатдорӣ маҳсуб мешавад». Миллати мо 9 сентябри соли 1991 ба ин неъмат даст ёфт ва аз он замон то кунун ин рӯз ҳамчун Рӯзи Истиқлолияти давлатии Ҷумҳурии Тоҷикистон дар саросари кишвари азизамон бо шукӯҳу шаҳомати хосса ва бо шукргузорӣ аз рушду суботи ҷомеа ва бунёдкориҳои азим таҷлил мегардад.
Соли ҷорӣ бо иштироки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар маркази ноҳияи Сангвор гулгашти Парчами давлатии Ҷумҳурии Тоҷикистон, майдончаи варзиш, се маркази савдо ва хизматрасонӣ ба истифода дода шуданд.
Дар деҳоти Сангвор як пули пиёдагузар, се синфхонаи иловагӣ дар назди муассисаи таълимии № 16, дар деҳоти Ваҳдат хобгоҳ барои духтарон, дар деҳоти Вахиё маркази савдо ва ду синфхонаи иловагӣ дар назди муассисаи таълимии № 56, дар деҳоти Тавилдара ҳаммом, дар муассисаи таълимии № 18 деҳаи Сариҷангали деҳоти Чилдара синфхонаҳои иловагӣ мавриди баҳрабардорӣ қарор гирифтанд. Боиси зикр аст, ки то соли 1991 дар ноҳия ҳамагӣ 14 муассисаи таълимӣ фаъолият дошт. Дар замони соҳибистиқлолӣ шумораи муассисаҳои таълимӣ хеле афзуд. Дар зарфи 28 сол 46 муассисаи таълимӣ сохта ба истифода дода шуд. Хонандагон пурра аз хонаҳои шахсӣ ва вагонҳо ба биноҳои хуштарҳу замонавӣ гузаштанд. Айни замон шумораи муассисаҳои таълимӣ ба 60 адад расидааст.
Дар самти рушди деҳот, сайёҳӣ ва ҳунарҳои мардумӣ таъмири асосии меҳмонсарой дар мавзеи Чашмаи Миркалон анҷом ёфт, зиёда аз 30 адад муҷассама, амсила ва пайкараҳои сарироҳии ҳайвонот ва парандаҳои нодир шоҳроҳро ҳусни тоза бахшиданд. Роҳҳои маркази ноҳия аз таъмири ҷорӣ бароварда шуда, як қисми роҳравҳо кошинпӯш гардиданд. Дар маҷмӯъ, аз ҳамаи сарчашмаҳои маблағгузорӣ 3,6 миллион сомонӣ корҳои сохтмонӣ ба анҷом расонда шудаанд.
То Ҷашни 30 - солагии Истиқлолияти давлатии Ҷумҳурии Тоҷикистон биноҳои Кумитаи иҷроияи Ҳизби Халқии Демократии Тоҷикистон, шуъбаи маориф ва Кумитаи давлатии амнияти миллӣ дар ноҳия, синфхонаҳои иловагӣ дар назди муассисаҳои таҳсилоти миёнаи умумии №№ 12, 13, 14, 16, 18, 20 ва 26, 4 майдончаи замонавии варзиш дар марказҳои деҳот, инчунин, пули пиёдагузар дар деҳаи Лайрони болои деҳоти Сангвор ва дигар иншоот бо дастгирии соҳибкорон ва аҳолӣ сохта ба истифода дода мешаванд.
Ба шарофати Истиқлолияти давлатӣ дар соҳаи тандурустӣ низ пешравиҳо назаррасанд. Аз ҷумла, дар ноҳия 1 беморхонаи марказӣ, ду беморхонаи минтақавӣ, як маркази саломатии ноҳиявӣ, 4 маркази саломатии деҳот, 22 бунгоҳи тиббӣ ба аҳолӣ хизмат мерасонанд, ки то ба даст омадани истиқлолият ҳамагӣ як беморхонаи минтақавӣ мавҷуд буд. Самтҳои асосии хоҷагидории ноҳия боғдорӣ, картошкапарварӣ, чорводорӣ, ғаллакорӣ ва занбӯриасалпарварӣ мебошанд, ки дар ин самт низ зиёда аз 600 хоҷагии деҳқонӣ фаъолият мекунад.
Имрӯзҳо баҳри таҳкимбахшӣ ва пойдории Истиқлолияти давлатӣ мардуми сарбаланди ноҳияи сангвор ба корҳои ободонию созандагӣ машғул буда, бо ҳидоятҳои Пешвои муаззами миллат дар шукуфоии диёр саҳм мегузоранд.
Дилшод АМИРОВ,
“Ҷумҳурият”
Баёни ақида (0) Санаи нашр: 11.10.2019 №: 192 Мутолиа карданд: 1927
