иқтисод
ПАНҶАКЕНТ. ИФТИТОҲИ КОРХОНАИ "ЗАРАФШОН ФРУТС"
Бо ибтикори иттиҳодияи фермерии «Ганҷи Зарафшон», ширкати «Агроснабтех», соҳибкорони маҳаллӣ ва дастгирии Ташкилоти байналмилалии «Oxfam» - и Британияи Кабир дар шаҳри Панҷакент аввалин корхонаи коркарди мева - «Зарафшон фрутс» ба фаъолият шурӯъ кард. Мақсад аз бунёди корхона зиёд намудани ҳаҷми истеҳсоли меваи хушк, таъсиси ҷойҳои нави корӣ ва афзун гардондани даромади деҳқонон арзёбӣ мешавад.
Шавкат Ализода, директори дафтари Ташкилоти байналмилалии «Oxfam»-и Британияи Кабир дар Тоҷикистон, иброз дошт, ки корхона барои истеҳсоли себи хушк махсус гардонда шуда, дар оянда навъҳои гуногуни ангурро низ ба хориҷи кишвар содир менамояд. Ин барои зиёд шудани истеҳсоли мева дар шаҳри Панҷакент ва ноҳияҳои дигари водии Зарафшон ва ҳавасмандии боғпарварон, ҳамчунин, дастрасии зиёда аз 800 боғпарвар ба бозори дохил ва хориҷи кишвар имкон фароҳам меорад.
Таъсиси корхонаи «Зарафшон фрутс» ба ҳадафҳои Ҳукумати кишвар, аз ҷумла «Барномаи давлатии мусоидат ба содирот ва воридотивазкунии Ҷумҳурии Тоҷикистон барои солҳои 2016 - 2020», мусоидат менамояд.
Корхона дар як соат то як тонна себ коркард мекунад. Тибқи нақша, бо насб намудани таҷҳизоти нав ҳаҷми истеҳсолот чор - панҷ баробар зиёд мегардад. Бо ин мақсад, шартномаи ҳамкорӣ имзо шуда, мувофиқи он ба наздикӣ барои корхона таҷҳизоти зарурӣ дастрас ва васлу насб мешавад.
Айни ҳол боғпарварон барои фурӯхтани себи аълосифат ниёз ба дастгирӣ надоранд. Дар корхона себи сифаташ дуюмдараҷа, ки онҳо ба фурӯш бароварда наметавонанд, коркард шуда, ҳамчун маҳсулоти хушкмеваи ватанӣ ба хориҷа содир мегардад.
Куллан беҳ шудани муносибатҳои гуногунҷанбаи Тоҷикистон ва Ӯзбекистон имконият фароҳам овард, ки хушкмеваи водии Зарафшон ба ин мамлакат содир гардад. Ин маҳсулот дар Ӯзбекистон харидори зиёд дорад. Хушкмеваҳои Тоҷикистон дорои сифати баланд буда, аз ҷиҳати экологӣ тоза эътироф шудаанд ва дар бозори ҷаҳонӣ, хусусан Аврупою Осиё, талабгорони зиёд доранд.
Ҳукумати ҷумҳурӣ дар ҳамкорӣ бо Ташкилоти байналмилалии «Oxfam»-и Британияи Кабир, шарикони рушд ва ташкилотҳои ҷамъиятии маҳаллӣ дар водии Зарафшон бо мақсади рушди деҳот чунин лоиҳаҳои судмандро амалӣ гардонда истодааст. Ҳадаф аз татбиқи лоиҳаҳо, мусоидат ба рушди устувори деҳот тавассути истифодаи захираҳои табиӣ, таъмини амнияти озуқаворӣ ва коҳиш додани сатҳи камбизоатӣ мебошад.
Кароматулло АТО,
«Ҷумҳурият»
Баёни ақида (0) Санаи нашр: 17.10.2019 №: 195 Мутолиа карданд: 2377
