ҳуқуқ
ҶИНОЯТ ва ҶАЗО
КОРРУПСИЯ
Ташхисгарони тиббӣ – судӣ барои 10000 доллар ҷавоб мегӯянд
Агентии назорати давлатии молиявӣ ва мубориза бо коррупсияи Ҷумҳурии Тоҷикистон ду ташхисгари тиббӣ - судиро барои талаби 10000 доллари амрикоӣ ҳамчун пора ба ҷавобгарии ҷиноятӣ кашид.
Тибқи иттилои дафтари матбуоти агентӣ, вобаста ба ҳолати тамаъҷӯӣ 19 сентябри соли ҷорӣ шаҳрванд «А» бо ариза ба шуъбаи минтақавии агентӣ дар шаҳру ноҳияҳои водии Ҳисор муроҷиат кардааст. Муроҷиаткунанда дар аризааш навиштааст, ки «нисбат ба эксперти тиббӣ - судии шуъбаи байниноҳиявии Турсунзода Убайдов Назирҷон Бобоқулович ва Ҳамраев Фирӯз Бобомуродович чораҳои қонунӣ андешида шавад. Чунки номбурдагон аз ӯ барои аз ҷавобгарии ҷиноятӣ озод намудани писари додараш, ки нисбаташ бо моддаи 139 қисми 4 Кодекси ҷиноятии Ҷумҳурии Тоҷикистон парвандаи ҷиноятӣ оғоз гардидааст, маблағи 10000 доллари ИМА талаб карда истодаанд».
Дар ҳамин асос худи ҳамон рӯз нисбат ба Н. Убайдов ва Ф. Ҳамраев бо моддаи 247 қисми 4 (қаллобие, ки ба миқдори махсусан калон содир шудааст) - и Кодекси ҷиноятӣ парвандаи ҷиноятӣ оғоз шуда, зимни гузарондани чорабиниҳои фаврӣ - тафтишотӣ Н. Убайдов баъди аз шаҳрванд “А” гирифтани 7000 доллар дастгир шудааст.
ҚАЛЛОБӢ
Декани факултет барои порахӯрӣ айбдор мешавад
Нисбат ба декани факултети иқтисод ва бизнеси Донишгоҳи давлатии молия ва иқтисоди Тоҷикистон Эмомалӣ Шералиев барои ришваситонӣ парвандаи ҷиноятӣ оғоз шудааст.
Бино ба иттилои сомонаи Агентии назорати давлатии молиявӣ ва мубориза бо коррупсия, декани факултет моҳи сентябри соли ҷорӣ бо роҳи фиреб аз шаҳрванд «А» барои дохил намудан ба курси дуюми таҳсил дар донишгоҳи мазкур 19000 сомонӣ ва 600 доллари амрикоӣ гирифта, ба манфиати шахсии худ истифода намудааст.
Ба ин далел, ҳоло тафтиши пешакии парвандаи ҷиноятӣ нисбат ба ӯ бо ҷурми қаллобӣ идома дорад.
АВБОШӢ
Тафтиши амали ҷинояткоронаи ноболиғон
Кормандони мақомоти милитсия дар ноҳияи Рӯдакӣ ду ноболиғи 17-солаеро дастгир намудаанд, ки дар содир намудани ҷиноятӣ авбошӣ гумонбар мешаванд.
Дар ин бора маркази матуботи ВКД хабар дод. Бино ба иттилои манбаъ, нимаи дуюми рӯзи 5 октябр гумонбарони ҳодиса як нафар ҳамсоли худро дар ноҳияи Рӯдакӣ латукӯб намуда, бо истифода аз олоти халандаю буранда ба ӯ зарари ҷисмонӣ расондаанд, ки дар беморхона бистарӣ шудааст.
Айни ҳол, ҳодиса мавриди тафтиши кормандони мақомоти корҳои дохилӣ қарор дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 17.10.2019 №: 195 Мутолиа карданд: 1545
