фарҳанг
"ЧАШМИ ЧОРИ ЧИЛУЧОРЧАШМА"
Вазорати фарҳанги Ҷумҳурии Тоҷикистон мақолаи рӯзноманигор Меҳрангез Қодирова «Чашми чори Чилучорчашма»-ро, ки аз 10 октябри соли 2019 дар рӯзномаи «Ҷумҳурият» нашр шудааст, мавриди таҳлилу баррасии ҳамаҷониба қарор дод.
Дар навиштаи хабарнигори рӯзнома сухан аз вазъи ёдгорие меравад, ки он арзиши баланди таърихӣ дошта, ба асрҳои VII – VIII мансуб аст. Ёдгорӣ аз ҷониби мутахассиси Институти таърих, бостоншиносӣ ва мардумшиносии ба номи Аҳмади Дониши Академияи илмҳои Ҷумҳурии Тоҷикистон А. П. Окладников ва дигарон мавриди таҳқиқу омӯзиш қарор гирифтааст.
Вобаста ба ҳифзу нигоҳдории ёдгории мазкур ва ободонии дохили он аз номи раиси ноҳияи Носири Хусрав аз 28 октябри соли равон ба вазорат мактуб ирсол гардидааст. Мавзеи бостонӣ – табиии Чилучорчашма айни ҳол дар мувозинаи «Пахтаи Шаҳритуз» - и ноҳияи Шаҳритуз қарор дорад. Дарвоқеъ дар ин макони сайру саёҳат ва сертамошо аз лиҳози санитарию гигиенӣ ва иншооти хизматрасонӣ камбудиҳо ба назар мерасанд. Вазорати фарҳанг барои баррасии масъалаи мазкур ва назорат аз болои мушкилоти ҷойдошта пайваста тадбирҳои судманд меандешад ва онро таҳти назорати доимии хеш қарор медиҳад. Масъулони бахши ҳифзи ёдгориҳои таърихии вазорат талош доранд, ки бо пайдо гардидани имкониятҳои бештар ҷиҳати бунёд намудани инфрасохтори зарурии дохили мавзеи Чилучорчашма чораҳои мушаххас амалӣ намоянд.
То ин дам мақомоти иҷроияи маҳаллии ҳокимияти давлатии ноҳияи Носири Хусрав дар ҳамкорӣ бо ташкилотҳои ғайридавлатӣ ва шуъбаю бахшҳои дахлдор бо мақсади рушди соҳаи сайёҳӣ дар ин мавзеъ як қатор корҳоро ба анҷом расондааст.
Шамсиддин ОРУМБЕКЗОДА,
вазири фарҳанги Ҷумҳурии Тоҷикистон
Баёни ақида (0) Санаи нашр: 15.11.2019 №: 215 Мутолиа карданд: 1258
