иқтисод
50 ИНШООТИ ҶАШНӢ ДАР 10 МОҲ. БАРДОШТ АЗ НОҲИЯИ МИР САЙИД АЛИИ ҲАМАДОНӢ
Дар ноҳияи Мир Сайид Алии Ҳамадонӣ бо мақсади дар сатҳи баланд таҷлил намудани Ҷашни 30 - солагии Истиқлолияти давлатии Ҷумҳурии Тоҷикистон аллакай як қатор иншооти ҷашнӣ, аз ҷумла дар шаҳраки Москва бинои маъмурии Ҳизби Халқии Демократии Тоҷикистон, маркази хизматрасонии «Омина», дар деҳаи Тагноби Ҷамоати деҳоти Даштигуло майдончаи варзишии футболи хурд, нуқтаи шустушӯйи мошин ва дар деҳаи Навободи Ҷамоати деҳоти Меҳнатобод дорухона мавриди баҳрабардорӣ қарор гирифтанд.
Бинои замонавии дуошёнаи КИ ҲХДТ дар ноҳия, бо дастгирии соҳибкорони маҳаллӣ бунёд гардида, дорои шаш дафтари корӣ мебошад. Ҳамчунин, аз ҳисоби ҲХДТ дар вилояти Хатлон, ба кормандони кумитаи иҷроияи ҳизби ноҳия мошини сабукрави хизматӣ тақдим гардид.
Маркази хизматрасонии «Омина» бо шароити муосир бо харҷи 400 ҳазор сомонӣ аз тарафи соҳибкори маҳаллӣ Хушнуд Чиллаев қомат афрохта, 20 сокини маҳаллӣ соҳиби ҷойи кори доимӣ гардид. Марказ дуошёна буда, дорои мағозаи хӯрокворӣ, дорухона, нуқтаи хизматрасонии филиали БДА «Амонатбонк», толори арӯсӣ, кошонаи ҳусн ва дандонпизишкӣ мебошад.
Бо иқдоми соҳибкори маҳаллӣ Фарҳоди Абдуназар майдончаи варзиш барои футболи хурд бо сатҳу сифати баланд сохта шуд, ки маблағи он беш аз 200 ҳазор сомониро ташкил дод. Машраб Сафаров соҳибкори маҳаллӣ нуқтаи шустушӯйи мошинро ба маблағи 190 ҳазор сомонӣ ифтитоҳ намуд.
Ҳамин тавр, соҳибкорон Муҳаммадҷон Ҷӯрахонов дорухонаи замонавӣ ва Раҷабалӣ Эмомов маркази савдо, дорухона сохта, ба истифода доданд.
Баробари ин, мумфаршкунии 6,8 километр роҳҳои мошингарди дохили деҳаи Гулободи деҳоти Меҳнатобод ба анҷом расид.
Раиси ноҳия Бозоралӣ Одиназода, иброз дошт, ки дар ноҳия бо дастуру ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон як қатор иншооти замонавӣ мавриди баҳрабадорӣ қарор гирифт ва хурсандии сокинони ноҳия ҳадду канор надорад.
Дар зарфи даҳ моҳи соли равон дар ноҳия 50 иншоот қомат афрохт, то Ҷашни 30 - солагии Истиқлолияти давлатӣ 196 иншооти таъйиноти гуногун ба истифода дода мешавад.
Кароматулло АТО,
Ҷумҳурият»
Баёни ақида (0) Санаи нашр: 27.11.2019 №: 224 Мутолиа карданд: 2242
