сафарҳо
Ҷаласаи навбатии Шӯрои амнияти дастаҷамъӣ
Ҷаласаи навбатии Шӯрои амнияти дастаҷамъӣ
5 сентябр Президенти Ҷумҳурии Тоҷикистон Эмомалӣ Раҳмон баҳри иштирок дар ҷаласаи навбатии Шӯрои амнияти дастаҷамъии Созмони аҳдномаи амнияти дастаҷамъӣ ба шаҳри Маскави Федератсияи Русия сафар кард.
Дар шаҳри Маскав бо ин ҳадаф роҳбарони ҳамаи давлатҳои аъзои созмон ҷамъ омаданд.
Хотиррасон мекунем, ки ба Созмони аҳдномаи амнияти дастаҷамъӣ Арманистон, Белорус, Русия, Тоҷикистон, Ӯзбекистон ва Қазоқистону Қирғизистон аъзоанд.
Дар ҷаласаи навбатии Шӯрои амнияти дастаҷамъӣ сарони давлатҳо оид ба маҷмӯи васеи масоили амнияти минтақавию ҷаҳонӣ ва густариши ҳамкориҳои ҳарбӣ ва ҳарбӣ-техникӣ гуфтушунидҳои судманд анҷом доданд.
Президенти Ҷумҳурии Тоҷикистон Эмомалӣ Раҳмон зимни муҳокимарониҳо, аз ҷумла таъкид дошт, ки баланд бардоштани самарабахшии фаъолияти Созмони аҳдномаи амнияти дастаҷамъӣ аз вазифаҳои муҳими рӯз аст.
Эмомалӣ Раҳмон таҳкиму густариши ҳамкориҳои ҳарбӣ ва ҳарбӣ-техникӣ, ҳамгироиҳои зиддитеррористӣ ва хусусан зидди истеҳсол ва гардиши ғайриқонунии маводи мухаддирро аз корҳои муҳиму саривақтӣ маънидод кард.
Сарони давлатҳо зимни нишастҳои расмӣ аз рӯйи натиҷаҳои он Эъломияи натиҷавии саммит ва якчанд санадҳои муҳими дигарро оид ба ҳамкориҳои ҳарбӣ-сиёсӣ ва ҳарбӣ-техникӣ, амнияти иттилоотӣ, омодасозии кадрҳои сохторҳои қудратӣ ва мубориза бо хатарҳои ҷаҳони муосир, аз ҷумла гардиши ғайриқонунии маводи мухаддир, қабул намуданд.
Шоми ҳамон рӯз Президенти Ҷумҳурии Тоҷикистон Эмомалӣ Раҳмон баъди анҷоми сафар аз шаҳри Маскав ба Ватан омад.
Баёни ақида (0) Санаи нашр: №: Мутолиа карданд: 5390
