иқтисод
БМТ. АФЗОИШИ ПАСАНДОЗҲО ШАҲОДАТИ ЗИЁДШАВИИ ЭЪТИМОДИ АҲОЛИСТ
Посух ба матлаби хабарнигорон Муҳаммадзоиршо Шарифзода ва Зокир Ҳасан «Бохтар обод мешавад, агар…», ки 27 ноябри соли 2019 дар рӯзномаи «Ҷумҳурият», № 224 (23827) интишор шудааст.
Пешниҳоди қарз барои рушди соҳибкорӣ самти афзалиятноки маблағгузориҳо дар кишвар ба ҳисоб рафта, фаъолияти ташкилотҳои қарзӣ низ баҳри рушди соҳаҳои иқтисодиёти ҷумҳурӣ назаррас мебошад. Хизматрасонии бонкӣ ба муштариён, аз ҷумла ба соҳаи соҳибкории хурду миёна, корхонаҳои истеҳсолу коркарди маҳсулот, бахши кишоварзӣ ва рушди содироти кишвар, рӯз ба рӯз беҳтар гашта истодааст.
Аз рӯи маълумоти ҷамъбастии моҳҳои январ - октябри соли 2019, ҳаҷми умумии қарзҳои додаи ташкилотҳои қарзӣ ба соҳаҳои гуногуни иқтисодиёти шаҳри Бохтар 195,9 миллион сомониро ташкил додааст, ки дар муқоиса ба ҳамин давраи соли гузашта 14,2 фоиз ё 24,4 миллион сомонӣ зиёд мебошад. Аз ҳаҷми умумии қарзҳои дар ин давра додаи ташкилотҳои қарзӣ ба шаҳри Бохтар маблағи 104,5 миллион сомонӣ ба соҳаи соҳибкорӣ рост меояд. Ин 53,3 фоизи ҳаҷми умумии қарзҳои додашударо ташкил медиҳад.
Бақияи пасандозҳо бошад, то 1 ноябри соли 2019 - ум 143,8 миллион сомониро ташкил намуд, яъне дар муқоиса ба ҳамин давраи соли гузашта 13,2 миллион сомонӣ ё 10,1 фоиз афзуд.
Афзоиши пасандозҳои аҳолии шаҳри Бохтар аз зиёд шудани эътимоди аҳолӣ ба низоми бонкӣ шаҳодат медиҳад.
Ҷамшед НУРМАҲМАДЗОДА, раиси Бонки миллии Тоҷикистон
Баёни ақида (0) Санаи нашр: 18.12.2019 №: 240 Мутолиа карданд: 741
