ҳуқуқ
БАҲСИ МАНЗИЛ ДАР НОҲИЯИ РӮДАКӢ Ё ЧАРО СУД ШАРТНОМАИ ХАРИДУФУРӮШРО БАЪДИ 10 СОЛ БЕКОР КАРД?
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 21 ноябри соли равон зимни мулоқот бо кормандони мақомоти судӣ бо нигаронӣ изҳор доштанд, ки фаъолияти нокифояи судӣ дар аксар маврид боиси норозигии шаҳрвандон гашта, онҳо ба Дастгоҳи иҷроияи Президенти Ҷумҳурии Тоҷикистон ва мақомоти болоӣ бо арзу шикоят муроҷиат менамоянд.
Бибироҳила Ҳакимова, сокини Ҷамоати шаҳраки Мирзо Турсунзодаи ноҳияи Рӯдакӣ, ба рӯзномаи «Ҷумҳурият» муроҷиат карда, аз ҳалномаи суди ноҳияи Рӯдакӣ норозигӣ кард.
- Соли 1993 шавҳарам ҳангоми кори сохтмонӣ фавтид. Ману се фарзандам бесарпаноҳ мондем. Ман маҷбур шудам, ки дар мағозаи бародарам Маҳмадсабур Тағоев, ки гирифтори бемории фалаҷ буд, ба савдо машғул шуда, рӯзгори худу фарзандонамро пеш барам ва ба бародарам низ ёрӣ расонам. Соли 1997 дар хонаи якҳуҷрагиам, воқеъ дар ноҳияи Рӯдакӣ бо фарзандонам зиндагӣ мекардам. Чун фарзандон калон шуданд, хона барояшон танг шуд. Аз ин рӯ, хонаи якҳуҷраамро фурӯхта, бо иловаи пасандозҳоям соли 2010 аз шаҳрванд Нурулло Бафоев манзили истиқоматиаш иборат аз ду ҳуҷраро харида, дар идораи нотариалии давлатӣ расман ба қайд гирифтам. Вақти харидани манзил собиқ соҳибхона ба ман забонхат дод, ки дар он бародарам Маҳмадсабур Тағоев ҳамчун шоҳид имзо гузоштааст. Вале намедонистам, ки рӯзе ин шоҳидӣ байни ману писараш баҳси судиро ба миён меорад, - гуфт Бибироҳила Ҳакимова.
Духтари калонии Бибироҳила низ ҳамроҳи модараш ба савдо машғул шуда, рӯзгорро якҷоя пеш мебурданд. Соли 2014 Аҳмад Мирзоев аз маҳаллаашон бо сабаби зарурат хонаи дуҳуҷраашро ба фурӯш мемонад. Бибироҳила бо сабаби ба камол расидани фарзандон ва танг шудани шароити зист хонаи ӯро низ харида, дар идораи нотариалии давлатӣ расман сабт мекунад.
Ба гуфтаи Бибироҳила Ҳакимова, моҳи октябри соли 2018 пас аз бемории тӯлонӣ бародараш вафот кард. Пас аз вафоти ӯ ҷанҷоли хонаҳои харидаи ӯ бо писари бародараш сар шуд. Писари бародараш ба суди ноҳияи Рӯдакӣ дар бораи бекор кардани шартномаҳои харидуфурӯши манзилҳои истиқоматӣ муроҷиат намуда, даъво овардааст, ки гӯё хонаҳои ман аз ҳисоби пулҳои бародарам - падари ӯ харида шудаанд. Суд парвандаро бе иштироки ман баррасӣ карда, баёнотҳои Нурулло Бафоев ва Аҳмад Мирзоевро ҳамчун далел эътироф намуда, пас аз 10 сол бо ҳалномаи судӣ шартномаҳои харидуфурӯши хонаҳои харидаи маро беэътибор донист. Гӯё дар маҷлиси судӣ Н. Бафоев ва А. Мирзоев тасдиқ намуда бошанд, ки пули хонаҳои харидаи маро бародарам Тағоев Маҳмадсабур додааст.
Ҳамсуҳбати мо зикр кард, ки, агар хонаҳои харидаи ӯ аз бародараш бошанд, пас чаро ӯ ҳангоми дар қайди ҳаёт будан онҳоро ба номи ҳамсару фарзандонаш накарда, ба номи ман ба расмият даровард? Ӯ иддао дорад, ки шахсони иштирокчии парванда бо ҳамдигар шиносоӣ ва муносибати хешутаборӣ дошта, бо додани баёнотҳои бофта, манзилҳои истиқоматии ӯро аз худ карданианд. Ба гуфтаи ӯ, далели дигар он аст, ки вақти харидани хона, ба ғайр аз шартномаи харидуфурӯш ба тариқи нотариалӣ, боз соҳибхонаи қаблӣ ба ман дар ҳузури шоҳидон, аз ҷумла бародарам М. Тағоем забонхат дод, ки маблағи пули хонаро аз ман гирифтааст.
Аз рӯи гуфтаи ӯ, бо гузашти 10 сол имрӯз Нурулло Бафоев, соҳиби қаблии яке аз хонаҳо, дар суд ҳамчун ҷавобгар баёнот додааст, ки пули хонаро на аз ман, балки аз бародарам Маҳмадсабур Тағоев гирифтааст. Ин дар ҳолест, ки ман бо сад азобу машаққат ва меҳнати ҳалол хонаи якҳуҷрагиамро фурӯхта, аз ӯ ва Аҳмад Мирзоев манзилҳои истиқоматиро харидаам.
Бибироҳила Ҳакимова мегӯяд, ки ба тантанаи адолат бовар дорад ва умед аст, ки баъди нашри арзи дилаш дар рӯзномаи «Ҷумҳурият» мақомоти суд ба доди ӯ мерасанд ва ҳақ ба ҳақдор бармегардад.
Лашкар ШАРИФЗОДА, «Ҷумҳурият»
Баёни ақида (0) Санаи нашр: 18.12.2019 №: 240 Мутолиа карданд: 778
