иқтисод
ДАНҒАРА. ТАЪСИСИ БЕШ АЗ 1000 ҶОЙИ КОР
Тайи 11 моҳи соли равон ба шуъбаи Агентии меҳнат ва шуғли аҳолӣ дар ноҳияи Данғара барои пайдо намудани ҷойи кор 1546 нафар муроҷиат карда, тавассути татбиқи чорабиниҳои Барномаи мусоидат ба шуғли аҳолӣ 1006 шаҳрванд, аз ҷумла 306 зан, дар соҳаҳои гуногуни хоҷагии халқ бо ҷойи кори доимӣ ва мавсимӣ таъмин гардид.
Салим Нуралиев, сардори шуъба, дар суҳбат ба хабарнигори «Ҷумҳурият» гуфт, ки ҳоло бо мақсади бо ҷойи кор таъмин намудани корҷӯён, баланд бардоштани сатҳи огоҳии бонувон дар маҳалҳо ва рушд додани соҳибкории хонаводагӣ, инчунин, ҷалби духтарону занон ба омӯзиши касбу ҳунарҳои мардумӣ чораҳои зарурӣ андешида мешаванд.
- Мувофиқ ба талаботи бозори меҳнат дар ҷамоатҳои шаҳраку деҳоти ноҳия аз ҳисоби корҷӯён 366 кас ба курсҳои омӯзишӣ, аз ҷумла ба дӯзандагӣ, гулдӯзӣ, қуроқдӯзӣ, зардӯзӣ, бофандагӣ, тоқидӯзӣ, қолинбофӣ, дуредгарӣ, табақтарошӣ, оҳангарӣ, асосҳои омӯзиши кор бо компютер, кафшергарӣ, омӯзиши забони чинӣ ва ороиши мӯй ҷалб шуда, соҳибкасб гардид, - гуфт Салим Нуралиев.
68 корҷӯи беихтисос ба корҳои ҷамъиятии музднок сафарбар гашт. Ба 49 шаҳрванд барои пешбурди соҳибкорӣ ба маблағи беш аз 172 ҳазор сомонӣ қарзи имтиёзнок дода шуд ва онҳо айни замон дар соҳаҳои гуногун, аз ҷумла чорводорӣ, ҳунарҳои мардумӣ, хизматрасонӣ фаъолият доранд.
Аз ҳисоби ҷавонон ва оилаҳои серфарзанд 47 нафар дар шуъбаи маориф ва беморхонаи марказии ноҳия бо ҷойи кори доимӣ таъмин гашт. Ҳамчунин, ба 198 нафар, аз ҷумла ба аскарони аз сафи Қувваҳои Мусаллаҳи кишвар баргашта ва шаҳрвандони аз маҳбас озодшуда, дар ҳаҷми умумии 85 ҳазору 380 сомонӣ кумакпулии яквақта пардохт гардид.
Бо мақсади дарёфти ҷойи кор бо ҷалби ташкилоту муассиса, ҷамоатҳои шаҳраку деҳот ва корфармоён 12 ярмаркаи ҷойҳои кори холӣ ва вазифаҳои озод гузаронда шуд. Аз ин ҳисоб 141 корҷӯ бо кори доимӣ таъмин ва нафарони зиёд, хусусан ҷавонон барои касбомӯзӣ роҳхат гирифтанд.
Кароматулло АТО,
«Ҷумҳурият»
Баёни ақида (0) Санаи нашр: 18.12.2019 №: 240 Мутолиа карданд: 1120
