иқтисод
АЛЮМИНИЙ. ҲАҶМИ СОДИРОТ МЕАФЗОЯД
Саноатчиёни мамлакат ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро сармашқи кори худ намуда, барои саноатикунонии босуръати кишвар, ки ҳоло ҳадафи чоруми миллӣ эълон шудааст, талош меварзанд. Дар пайи заҳмату талоши кормандони соҳаҳои саноати мошинсозӣ, мудофиа ва кимиё танҳо дар моҳи ноябри соли равон ба маблағи 205,9 миллион сомонӣ маҳсулот истеҳсол гардида, суръати афзоиш назар ба ҳамин давраи соли гузашта 181,8 дарсад боло рафт. Назар ба моҳи ноябри соли сипаришуда 92,6 миллион сомонӣ зиёд маҳсулот истеҳсол гардид.
Дар маҷмӯъ, корхонаҳои соҳа дар 11 моҳи соли равон ба маблағи 1,8 миллиард сомонӣ маҳсулот истеҳсол намуданд, ки нисбат ба 11 моҳи соли гузашта 384,8 миллион сомонӣ зиёд аст.
КВД «Ширкати алюминийи тоҷик» дар ин муддат ба маблағи 398,1 миллион сомонӣ (90242 тонна) маҳсулот истеҳсол намуд. Корхонаҳои коркарди алюминий дар 11 моҳ 8900 тонна алюминийро коркард намуда, суръати афзоишро ба 134 дарсад таъмин намудаанд.
Коркарди алюминий дар ин муддат чун солҳои гузашта, асосан ба КВД «Ширкати алюминийи тоҷик», ҶДММ КМ «Тоҷпроф», ҶДММ «Ноқили Талко» ва ҶСП «Ноқили Турсунзода» рост меояд.
Тибқи маълумотҳои оморӣ, дар ёздаҳ моҳ корхонаҳои соҳаи мошинсозӣ, саноати мудофиа ва химия якҷо бо КВД «Ширкати алюминийи тоҷик» ба хориҷи кишвар, хусусан ба давлатҳои Аврупо, Ӯзбекистон, Туркманистон, Қирғизистон, Туркия, Эрон ва Афғонистон, ба маблағи 1,6 миллирд сомонӣ маҳсулот (молҳои саноатӣ, профилҳои алюминийӣ, қубурҳои металлӣ ва арматураҳои сохтмонӣ) содирот намуданд.
КВД «Ширкати алюминийи тоҷик» ба хориҷи кишвар (асосан давлатҳои Аврупо) ба маблағи 158 миллион доллари ИМА маҳсулот фурӯхтааст.
ҶДММ «Талко Кемикал» аз моҳи апрели соли равон, тибқи нақша, ба истеҳсоли маҳсулоти кимиёвӣ - алюминийи фтордор, криолит ва коагулянт шурӯъ намуда, дар ин муддат ҳаҷми истеҳсоли маҳсулотро ба 51,7 миллион сомонӣ расонд. 3605 тонна фториди алюминий, 417,6 тонна криолит, 438,3 тонна кислотаи сулфат ва 820 тонна коагулянт истеҳсол гардид. Ба маблағи 34,3 миллион сомонӣ (2496,8 тонна) фториди алюминий ба Федератсияи Россия фурӯхта шуд.
Шаҳбоз АБРОР, «Ҷумҳурият»
Баёни ақида (0) Санаи нашр: 19.12.2019 №: 241 - 242 Мутолиа карданд: 736
