ҳуқуқ
ЗАМИН. БАҲСИ ДУ ХОҶАГИИ ДЕҲҚОНӢ ДАР НОҲИЯИ ФАРХОР
Мо 7 марти соли 2018 бо қарори раиси ноҳияи Фархор аз ҳисоби заминҳои захираи давлатӣ, воқеъ дар Ҷамоати деҳоти Ғайрат, мавзеи Олимтойи ноҳия майдони 95,01 гектарро гирифтем ва дар заминаи он хоҷагии деҳқонии «Осим - 18» таъсис додем. Дар асоси қарори раиси ноҳия 17 апрели ҳамон сол аз ҷониби КДФ «Бақайдгирии молу мулки ғайриманқул» ба хоҷагии деҳқонӣ шаҳодатнома дар бораи бақайдгирии давлатӣ дода шуд.
Вале боз аз 30 январи соли 2019 бо қарори раиси ноҳия, аз мавзеи номбурда ба миқдори 188,11 гектар ба хоҷагии деҳқонии «Толибҷон» барои истифодаи бемуҳлат ҷудо карда шудааст. Гап дар сари он ки тарҳҳои 38, 40 ва 41 бо қарори раиси ноҳия ба хоҷагии деҳқонии «Осим - 18» тааллуқ доранд. Дар натиҷа миёни мо ва Маҳмадалӣ Намозов, сардори хоҷагии деҳқонии «Толибҷон», нофаҳмӣ сар зада, кор ба баҳсҳои доманадори судӣ кашида шуд.
Тибқи ҳалномаи суди иқтисодии вилояти Хатлон аз 2 июли соли 2019 аризаи даъвои хоҷагии деҳконии «Осим - 18» ба ҷавобгарии мақомоти иҷроияи маҳаллии ҳокимияти давлатии ноҳияи Фархор, кумитаи идораи замини ноҳия ва хоҷагии деҳқонии «Толибҷон» дар бораи беэътибор донистани қарори раиси ноҳия аз 30 январи соли 2019 ва бартараф кардани монеагӣ оид ба истифодаи замин рад гардидааст. Инчунин, аризаи даъвои муқобили даъвои хоҷагии деҳқонии «Толибҷон» ба ҷавобгарии хоҷагии деҳқонии «Осим - 18», мақомоти иҷроияи маҳаллии ҳокимияти давлатии ноҳияи Фархор, кумитаи идораи замини ноҳия ва Ҷамоати деҳоти Ғайрат дар бораи беэътибор донистани қарори раиси ноҳия аз 7 марти соли 2018 қонеъ шуд.
Дар марҳилаи кассатсионии Суди Олии иқтисодии Ҷумҳурии Тоҷикистон бошад, ҳалномаи суди иқтисодии вилояти Хатлон бетағйир ва шикояти кассатсионӣ беқаноат монд.
Суд онро асос кардааст, ки аз 26 августи соли 2005 бо қарори раиси Ҷамоати деҳоти Ғайрат барои рушди соҳаи чорводорӣ ба хоҷагии деҳқонии «Толибҷон» майдони умумии 187, 77 гектар замин вобаста гардидааст. Ҳол он ки хоҷагии деҳқонии «Толибҷон» ҳуҷҷати тасдиқкунандаи замин надорад, инчунин, дар харитаи навбатдории КДФ «Бақайдгирии молу мулки ғайриманқул» сабт нашуда, андози заминро пардохт накардааст.
Ҳамчунин, мувофиқи қисми 1 моддаи 19 Қонуни Ҷумҳурии Тоҷикистон «Дар бораи хоҷагиҳои деҳқонӣ (фермерӣ)», қитъаи замин барои ташкили хоҷагии деҳқонӣ бо ҳуқуқи истифодаи якумраи меросӣ бо ҳуқуқи бегона намудан дар асоси аризаи шаҳрванд (шаҳрвандон) тибқи қарори мақомоти иҷроияи маҳаллии хокимияти давлатии ноҳияҳо (шаҳрҳо) дода мешавад.
«Ҳуқуқи истифодабарии қитъаи замин аз лаҳзаи бақайдгирии давлатӣ бо тартиби муқаррарнамудаи Қонуни Ҷумҳурии Тоҷикистон «Дар бораи бақайдгирии давлатии молу мулки ғайриманқул ва ҳуқуқ ба он» тасдиқ карда мешавад», - омадааст дар қисми 1 моддаи 25 Қонуни Ҷумҳурии Тоҷикистон «Дар бораи хоҷагиҳои деҳқонӣ (фермерӣ)».
Гузашта аз ин, дар дигар моддаҳои қонуни мазкур дар бораи додани қитъаи замин барои ташкили хоҷагиҳои деҳқонӣ бо қарори мақомоти иҷроияи маҳаллии ҳокимияти давлатии шаҳру ноҳияҳо гуфта шудааст, на бо қарори Ҷамоати шаҳрак ва деҳот. Тибқи талаботи моддаи 713 Кодекси замини Ҷумҳурии Тоҷикистон заминҳои захираи давлатӣ бо қарорҳои раисони ноҳияҳо (шаҳрҳо) ҷудо карда мешаванд.
Бояд тазаккур дод, ки Ҷамоати деҳот тибқи талаботи сархати ҳафтуми моддаи 11 Қонуни Ҷумҳурии Тоҷикистон «Дар бораи мақомоти худидоракунии шаҳрак ва деҳот» (дар таҳрири қонуни соли 2009 қабулгардида), танҳо ба назорати истифода ва ҳифзи заминҳои ҳудуди шаҳрак ва деҳот ваколат дорад.
Хайрулло КОМИЛОВ,
Самариддин КОМИЛОВ,
сокинони ноҳияи Фархор
Баёни ақида (0) Санаи нашр: 20.12.2019 №: 243 Мутолиа карданд: 1118
