ҳуқуқ
ҶАҲОЛАТ БАДБАХТӢ МЕОРАД!
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мулоқот бо кормандони мақомоти судӣ таъкид доштанд: «Нақш ва мавқеи ҳокимияти судӣ дар идораи давлат ва пешрафти ҷомеа хеле муҳим мебошад, зеро ҳокимияти судӣ дар асоси Конститутсия ва қонунҳо ҳуқуқу озодиҳои инсон, манфиатҳои давлат, ташкилоту муассисаҳо ва қонунияту адолатро ҳифз менамояд».
Таҷрибаи судӣ нишон медиҳад, ки аксари ҷиноятҳои содиргашта аз надонистани одитарин ҳуқуқҳои шаҳрвандӣ аз ҷониби аҳолӣ сарчашма мегирад. Аз ин рӯ, баҳри пешгирии болоравии сатҳи ҷинояткорӣ ва баланд бардоштани маърифати ҳуқуқии шаҳрвандон бояд чораҳои муассир андешида шаванд.
Мунтазам ташкил кардани корҳои тарғиботӣ- омӯзишӣ дар маҳалҳо, чоп ва паҳн намудани варақаҳои ҳуқуқӣ, ҳамкории бевоситаи мақомоти маҳаллӣ бо мақомоти судӣ, таҳияи барномаҳои ҳуқуқӣ дар телевизион, матбуот ва дигар васоити ахбори омма ба манфиати кор мебошад.
Сарвари давлат муҳтарам Эмомалӣ Раҳмон дар суханронӣ ва мулоқотҳои судманди хеш ҳамеша таъкид ва аҳли ҷомеаро вазифадор менамоянд, ки афзоиши хатари терроризм ва экстремизм дар ҷаҳони муосир имрӯз бештар ба чашм мерасад. Аз тарафи мақомоти ҳифзи ҳуқуқ вақтҳои охир дастгир шудани гурӯҳҳои ҷиноятие, ки мехостанд дар минтақаҳои сарҳадӣ ва дохили Тоҷикистон амалҳои террористӣ анҷом диҳанд, гувоҳи ин гуфтаҳост.
Бинобар ин, мақомоти судӣ бо дигар мақомоти ҳифзи ҳуқуқ ва сохторҳои низомӣ бо ҳушёриву зиракии сиёсӣ ва баланд бардоштани донишу малакаи касбӣ, инчунин, бо истифода аз шаклу усулҳои муосир муборизаро бар зидди терроризм ва экстремизм, зуҳуроти ҷинояткории муташаккили фаромиллӣ, қочоқу муомилоти ғайриқонунии маводи мухаддир ва дигар қонуншиканиҳо тақвият диҳанд.
Пешрафти босуботи давлат ва ҷомеа, пеш аз ҳама, ба таъмини амният, волоияти қонун, таҳкими тартиботи ҷамъиятӣ ва риояи ҳуқуқу озодиҳои инсон ва шаҳрванд асос меёбад. Таъмини тартиботи ҳуқуқӣ, амнияти давлат, суботу оромии ҷомеа, ҳифзи ҳуқуқу озодиҳои инсон ва шаҳрванд, инчунин, мубориза бо ҷинояткорӣ вазифаи бевоситаи хизматӣ ва қарзи ҳар як корманди мақомоти ҳифзи ҳуқуқ ба ҳисоб меравад. Аз ин рӯ, бо мақсади таъмини тартиботи ҷамъиятӣ, суботу оромии ҷомеа, пешгирӣ ва сари вақт ошкор кардани ҷиноятҳо, муайян ва бартарафсозии сабабу омилҳои содиршавии онҳо бояд чораҳои ҷиддӣ андешем.
Аз тарафи дигар, дар шароити бисёр мураккабу печидаи ҷаҳони муосир, хусусан афзудани таҳдиду хатарҳои нав, аз қабили экстремизму терроризм, моро зарур аст, ки ба шукронаи давлати соҳибистиқлолу соҳибихтиёр барои суботу пешрафти сарзамини аҷдодӣ ҷаҳду талош намоем. Зеро ифротгароиву хурофотпарастӣ сарчашмаи ҷаҳолату торикӣ буда, ба миллату давлат танҳо бадбахтӣ меорад ва ба рушду тараққиёти ҷомеаву давлат монеаҳои ҷиддӣ эҷод мекунад. Бо ин мақсад бояд донишҳои сиёсиамонро пайваста такмил диҳем, аз таҳаввулоти босуръати ҷаҳони имрӯза мунтазам огоҳ ва барои ҳимояи манфиатҳои милливу давлатӣ ҳамеша омода бошем.
Аз ин рӯ, гузариш ба муносибатҳои иқтисодии бозаргонӣ, ташаккулёбии арзишҳои демократӣ, ташкили ҷомеаи шаҳрвандӣ, гузарондани ислоҳоти сиёсию ҳуқуқӣ ва тарғиби ҳуқуқу озодӣ ва вазифаҳои асосии шаҳрванд тақозо менамоянд, ки дар бобати беҳтар намудани тарбияи ҳуқуқӣ ва баланд бардоштани маърифати ҳуқуқӣ тадбирҳои зарурӣ андешем.
Шаъмигул НУРУЛЛОЗОДА,
судяи суди ноҳияи Рӯдакӣ
Баёни ақида (0) Санаи нашр: 25.12.2019 №: 248 Мутолиа карданд: 1145
