ҳуқуқ
ҒОРАТГАРӢ. СУД ҶИНОЯТКОРРО 5 СОЛ РАВОНАИ ЗИНДОН КАРД
Суди ноҳияи Синои шаҳри Душанбе парвандаи ҷиноятиро нисбат ба Рустам Деҳқонов, сокини ноҳияи Ёвон, баррасӣ намуда, ӯро барои содир намудани ҷинояти ғоратгарӣ, яъне ошкоро тасарруф кардани молу мулки ғайр ба муддати 5 сол равонаи зиндон кард.
Тафтишот муайян кард, ки Рустам Деҳқонов дар кӯчаи Р. Набиеви пойтахт ба шаҳрванд Оксана Кобес дарафтода, бо таҳдиди истифодаи зуроварӣ аз дасти ӯ ҷузвдонашро дошта, мақсади тасарруф кардан дошт. Ҷабрдида Оксана Кобес муқобилият нишон дода, нагузоштааст, ки Рустам Деҳқонов ҷузвдонро гирад. Бо вуҷуди ин, ҷинояткор ҷузвдони ӯро раҳо накарда, аз ӯ маблағи 300 сомонӣ талаб кардааст. Ҳарчанд шаҳрванд Оксана Кобес исрор кардааст, ки пул надорад, лекин Р. Деҳқонов ба ӯ бовар накарда, маҷбурӣ аз дасти ӯ ҷузвдонашро гирифта, бо мақсади ба даст овардани маблағи пулӣ амволи дар дохили он бударо дар замин холӣ кардааст.
Дар натиҷа, бо муроҷиати телефонии ҷабрдида кормандони милитсия фавран ба ҷойи ҳодиса омада, ҷинояткорро дастгир намуданд.
Суд кирдори судшаванда Рустам Деҳқоновро бо моддаҳои 32 қисми 3, 248 қисми 2 банди «г» Кодекси ҷиноятии Ҷумҳурии Тоҷикистон баррасӣ намуда, ба ӯ ҷазо дар намуди маҳрум сохтан аз озодӣ ба муҳлати 5 сол бо адо кардани ҷазо дар муассисаҳои ислоҳии низомашон пурзӯр таъйин кард.
Бо далели он ки судшаванда Рустам Деҳқонов ҷинояти мазкурро то қабули Қонуни Ҷумҳурии Тоҷикистон «Дар бораи авф» аз 25 ноябри соли 2019, таҳти № 1648 содир намудааст, суд бо татбиқи моддаи 7 сархати 3 – и қонуни мазкур ҷазои адонагардидаро нисбат ба ӯ аз се як ҳисса кам намуд.
Т. АМИРЗОДА, судяи суди ноҳияи Сино
М. БАҲРОМ, «Ҷумҳурият»
Баёни ақида (0) Санаи нашр: 25.12.2019 №: 248 Мутолиа карданд: 1176
