порлумон
МИНТАҚАИ РАШТ. ИНТИХОБОТ ОЯНДАРО МЕСОЗАД!
Дар минтақаи Рашт ҷиҳати дар сатҳи баланди ташкилӣ гузарондани интихоботи даъвати нави вакилони Маҷлиси намояндагони Маҷлиси Олӣ ва вакилони маҷлисҳои маҳаллии вакилони халқ корҳои омодагӣ идома доранд. Тавре Муллоҷон Аҳмадов, раиси комиссияи ҳавзаи ҳудудии якмандатаи Рашт, № 12 оид ба интихоботи вакилони Маҷлиси намояндагони Маҷлиси Олии Ҷумҳурии Тоҷикистон, зимни суҳбат бо хабарнигори “Ҷумҳурият” иттилоъ дод, ҳавзаи интихоботӣ фаъолияти худро дар асоси қонунгузорӣ вобаста ба интихобот ва санадҳои байналмилалии аз ҷониби Тоҷикистон эътирофгардида ба роҳ мондааст.
Ба гуфтаи ӯ, нахуст ҳайати ҳавза бо қарори Комиссияи марказии интихобот ва раъйпурсии Ҷумҳурии Тоҷикистон дар бораи ташкил намудани ҳавза шинос шуда, вазифаҳои онҳо дар асоси қарори ҳавза муайян гардиданд. Ҷадвали навбатдории ҳайати комиссия таҳия гардида, мавриди амал қарор дорад. Ҳуҷҷатгузорӣ мувофиқи матлаб ба роҳ монда шуда, 198 участкаи интихоботӣ дар ҳудуди ҳавза ташкил ва рақамгузорӣ шуд. Рақам, нишонӣ, маҳали аҳолинишин, ҷойи овоздиҳӣ ва ҳайати комиссияи участкаҳои ҳавза дар 3 шумораи рӯзномаи “Оинаи Рашт” ба нашр расида, дар ҳамаи маҳалҳои овоздиҳии ноҳияҳои Рашт, Нуробод, Лахш, Сангвор ва Тоҷикобод манзури хонандагон гардид. Лавҳаи ҳавза ва лавҳаҳои участкаҳои интихоботӣ тибқи дастури КМИР омода ва насб гардиданд. Ҷойи кории ҳайати ҳавза ва коргоҳҳои комиссияҳои участкавӣ ҷиҳозонда шуда, дар дафтари кории ҳавза гӯшаи иттилоотӣ ташкил гардид.
Ҳоло 6 нафар барои ба қайд гирифтан ба номзадии вакили Маҷлиси намояндагони Маҷлиси Олии Ҷумҳурии Тоҷикистон ба ҳавзаи якмандатаи Рашт, № 12 ариза пешниҳод кард. Аз ин шумора 3 нафар ба тариқи худпешбарӣ, 1 нафар аз тарафи Ҳизби Халқии Демократии Тоҷикистон, 1 нафар аз тарафи Ҳизби аграрии Тоҷикистон ва 1 нафар аз тарафи Ҳизби ислоҳоти иқтисодии Тоҷикистон мебошад. Ҳуҷҷатҳои номзадҳо омода гардида, ҳоло дар омӯзиш қарор доранд.
- Дар участкаҳои интихоботӣ тамоми шароити мусоид фароҳам буда, бо интихобкунандагон ҷиҳати иштироки фаъол ва озодона дар интихобот корҳои фаҳмондадиҳӣ гузаронда мешаванд. Барои мушоҳидачиёни миллию байналмилалӣ низ шароити хуб муҳайё карда шудааст. Инчунин, барои интихобкунандагоне, ки бинобар вазъи саломатӣ иштирокашон дар интихобот имконнопазир мебошад, ташкили қуттиҳои сайёр ба роҳ монда шудааст, - гуфт дар хотимаи суҳбат Муллоҷон Аҳмадов.
Худодод ЗАЙНИДДИН, “Ҷумҳурият”
Баёни ақида (0) Санаи нашр: 24.01.2020 №: 18 Мутолиа карданд: 642
