маориф
КӮДАКИСТОНҲО. ҲАРЧИ БИСЁР БОШАНД...
Нақши муассисаҳои томактабӣ дар тарбияи зеҳнӣ ва маънавии кӯдакон хеле барҷаста мебошад. Аз ин рӯ, Президенти кишвар муҳтарам Эмомалӣ Раҳмон дар паёмҳои худ ба Маҷлиси Олӣ ба кам будани шумораи муассисаҳои томактабӣ ишора карда, дар бораи аҳамияти онҳо махсус истода мегузаранд. Аз ҷумла, таъкид кардаанд: «Мо, пеш аз ҳама, ба инкишофи зинаи таҳсилоти томактабӣ диққати ҷиддӣ дода, бояд шумораи муассисаҳои томактабиро бамаротиб зиёд намоем ва барои рушди қобилияти зеҳнии кӯдакон шароити мусоид фароҳам созем».
Мавриди зикр аст, ки нақши фарҳанг, ташвиқоту тарғиботи таълиму тарбияи насли наврас дар таҳкими эҳсоси ватандорӣ, худшиносии миллӣ, эҳтиром ба таърихи ниёгон ва пешгирии низоъҳои иҷтимоӣ ниҳоят бузург аст. Дар акси ҳол надонистани сарнавишти таърихи миллати худ, фориғболию бехабарӣ ва носипосӣ нисбат ба мероси маънавию фарҳангӣ шахсро ба инкори ҳақиқат ва гумроҳӣ мерасонад. Ҳамагон шоҳиди он будем, ки солҳои 2014 - 2016 баъзе аз ҷавонон аз рӯи ҷаҳолату нодонӣ, гумроҳӣ ва тақлиду пайравии кӯр – кӯрона ба ҳизбу ҳаракатҳои террористиву ифротгаро, бахусус, гурӯҳи “Давлати исломӣ” пайвастанд ва ҷони худро аз даст доданд. Як гурӯҳ, ҳатто, хонаводаашонро аз паси худ бурданд, ки ҷои таассуф аст. Фарзандони аксари онҳо бо модарони зиндониашон дар шароити ногувор ба сар мебурданд. Бо супориши Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 30 апрели соли гузашта 84 кӯдаки тоҷик аз Ироқ ба Ватан баргардонда шуд. Ҳукумати кишвар барои ин кӯдакон тамоми шароитро муҳайё кардааст ва онҳо ба таълиму тарбия фаро гирифта шудаанд.
Надонистани сарнавишти таърихӣ ва мероси маънавию фарҳангии миллати худ шахсро ба бегонапарастию қадр накардани қимати дастовардҳои истиқлолият оварда мерасонад. Бинобар ин, Сарвари давлат чопи дигарбораи китоби аллома Бобоҷон Ғафуровро дар замони зудтағйирёбанда ва бархӯрди манфиатҳо пешниҳод карданд, ки қобили дастгирӣ ва пайравист.
Ин ба дӯши мо - волидону омӯзгорон ва, дар умум, ҷомеа масъулияти бузурге гузоштан аст, то фарзандонро аз хурдсолӣ дар рӯҳияи ватандӯстӣ, худшиносӣ ва эҳтиром ба арзишҳои муқаддаси миллӣ тарбия намоем.
Агар ба мероси адабии ниёгонамон ба дидаи таҳқиқ назар андозем, ба чунин хулоса меоем, ки онҳо аксаран панду насиҳатанд, аз таҷрибаи рӯзгор гирифта, ба таълиму тарбияи насли наврас нигаронда шудаанд.
Асарҳои панду ахлоқӣ аз осори Абуабдуллоҳи Рӯдакӣ сар карда, то «Насиҳатнома» - и Унсурулмаолии Кайковус, «Бӯстон» ва «Гулистон» - и Саъдии Шерозӣ, «Баҳористон» - и Абдураҳмони Ҷомӣ маҳз фарогири тарбияи ахлоқианд, ки моро ба роҳи рост ҳидоят мекунанд.
Аз ин ҷост, ки дар Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд», ки бо ташаббус ва пешниҳоди Пешвои миллат муҳтарам Эмомалӣ Раҳмон соли 2011 қабул гардид, маҳз масъалаҳои хеле муҳими тарбияи насли наврас ба назар гирифта шудаанд. Дар қонуни мазкур масъулияти асосӣ ба зиммаи оила, пеш аз ҳама, волидайн гузошта шудааст. Зеро хишти аввал дар инкишофи ояндаи кӯдак ва камолоташ бо дастони падару модар чида мешавад.
Рухшона МАДИСОЕВА,
мудири кӯдакистони № 138, ноҳияи Синои шаҳри Душанбе
Баёни ақида (0) Санаи нашр: 27.01.2020 №: 19 Мутолиа карданд: 2556
