порлумон
НОҲИЯИ ФИРДАВСӢ. АҲАМИЯТИ ИНТИХОБОТ ДАР БАЙНИ СОКИНОН ТАРҒИБ МЕШАВАД
Тавре ба ҳамагон маълум аст, 1 марти соли ҷорӣ дар кишвар маъракаи муҳими сиёсӣ - интихоботи вакилони Маҷлиси намояндагони Маҷлиси Олии Ҷумҳурии Тоҷикистон, маҷлисҳои маҳаллии вакилони халқ ва ҷамоатҳо доир мегардад. Ҳоло таҳти назорати бевоситаи Комиссияи марказии интихобот ва раъйпурсии Ҷумҳурии Тоҷикистон дар тамоми шаҳру ноҳияҳои мамлакат корҳои омодагӣ ба раванд ва баргузории интихобот вусъат ёфта истодаанд.
Комиссияи ҳавзавии интихобот оид ба интихоботи вакилони Маҷлиси намояндагони Маҷлиси Олии Ҷумҳурии Тоҷикистон дар ҳавзаи ҳудудии якмандатии интихоботии Фирдавсӣ № 1 дар қатори дигар ҳавзаҳои интихоботӣ барои дар сатҳи хуби ташкилӣ гузарондани ин маъракаи муҳими сиёсӣ корҳои назаррасро ба анҷом расондааст.
Азимқул Эшонқулов, раиси комиссияи ҳавзавии интихоботии Фирдавсӣ № 1, зимни суҳбат чунин гуфт: «Аз ҳавзаи интихоботии мо 4 довталаб - Эмомалӣ Насриддинзода (Ҳизби Халқии Демократии Тоҷикистон), Ҷамшед Юнусов (Ҳизби коммунистии Тоҷикистон), Даринг Раҳмон (Ҳизби ислоҳоти иқтисодии Тоҷикистон) ва Аббосалӣ Давлатов (худпешбарӣ) барои ба даст овардани унвони вакили Маҷлиси намояндагони Маҷлиси Олӣ талош меварзанд».
Бино ба гуфтаи раис, довталабон аз санҷиши донистани забони давлатӣ гузаштаанд.
Ҳавзаи интихоботии Фирдавсӣ № 1 дар ҳамкорӣ бо мақомоти иҷроияи маҳаллии ҳокимияти давлатии ноҳияи Фирдавсӣ ҳудуди 45 участкаи интихоботиро муайян намудаанд, ки нишонии онҳо дар рӯзномаи шаҳрӣ - «Паёми Душанбе» ба табъ расидааст. Дар ҳавза ва участкаҳои интихоботӣ маводи зарурии маърифатӣ - ҳуқуқӣ ва конселярӣ таъмин гардида, ҷиҳати таъмини иштироки фаъолонаи интихобкунандагон корҳои тарғиботию ташвиқотӣ идома доранд. Тибқи иттилои манбаъ, шумораи интихобкунандагон дар ҳудуди ҳавза 84 000 нафарро ташкил медиҳад.
- Барои бе мушкилӣ гузарондани интихобот бо шахсони масъули участкаҳои интихоботӣ семинар - машварати омӯзишӣ доир намудем, ки баъзеашон бори аввал дар ин маъракаи муҳими сиёсӣ иштирок мекунанд, - гуфт Азимқул Эшонқулов.
Чуноне Назокат Маҳмадзода, муовини раиси ноҳияи Фирдавсӣ, иброз дошт, дар ҳудуди ноҳия (даромадгоҳҳои ноҳия, ҷойҳои серодам) 11 банери тарғиботӣ, ба монанди «Барои шукуфоии Тоҷикистон овоз диҳед» ва «1 марти соли 2020- интихоботи вакилони Маҷлиси намояндагони Маҷлиси Олии Ҷумҳурии Тоҷикистон» гузошта шудааст. Инчунин, ҳар рӯз аз ҷониби раиси ноҳия бо мардум суҳбату вохӯриҳо гузаронда мешаванд. Дирӯз чунин чорабинӣ дар толори муассисаи таҳсилоти миёнаи умумии № 49 баргузор гашт, ки ҳадаф аз он иттилоотонии сокинон ва фаҳмондани моҳият ва муҳимияти интихоботи дарпешистода буд.
Маҳмуд БАҲРОМ, «Ҷумҳурият»
Баёни ақида (0) Санаи нашр: 29.01.2020 №: 21-22 Мутолиа карданд: 806
