маориф
ПАЁМ. АНДЕШАҲОЕ, КИ БОЯД ГУФТ
Паёми Пешвои муаззами миллат ҳуҷҷати тақдирсоз ва роҳнамову мушкилкушост дар масири ободии Ватан ва таъмини зиндагии шоистаи мардум. Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо таваҷҷуҳ ба масъалаҳои иқтисодию иҷтимоӣ, сиёсати дохилию хориҷӣ, рушди фарҳанг, ҳамчунин, дар робита ба мавзӯи фазилати донишандӯзиву касбу ҳунаромӯзӣ дастуру маслиҳатҳои ҳикматбор доданд.
Усмоналӣ Нурзода, муовини раиси Шӯрои уламои Маркази исломии Ҷумҳурии Тоҷикистон дар вилояти Хатлон, сархатиби шаҳри Бохтар, зимни суҳбат бо қаноатмандӣ тавсияҳои хирадмандонаи дар Паём зикргардидаи Пешвои миллатро ҷонибдорӣ карда, эҳсоси фараҳмандӣ намуданд, ки дар баробари баррасии масъалаҳои ҳаётан муҳим, чун ҳамеша ба мавзӯи тарбияи фарзандон ва омӯхтани илму ҳунар низ диққати ҷиддӣ зоҳир намудаанд.
- Бо назардошти эътимоди Сарвари давлат моро лозим аст бо дилгармиву самимияти хос ҷиҳати бунёди кӯдакистону муассисаҳои таълимӣ дар амал чораҳои зарурӣ андешем. Воқеан, дар вилояти Хатлон тамоми масҷидҳо хуштарҳ бо шакли меъмории хусусияти миллидошта мувофиқ ба талаботи замон қомат афрохтаву дар фазои сулҳу ороми кишвар, мардум дар шароити мусоид ба тоату ибодат машғуланд, ки ин ҳама дастоварду бунёдкориҳо ва рушди дину мазҳабамон дар заминаи сиёсати фарҳангдӯстонаи Президенти мамлакат муҳтарам Эмомалӣ Раҳмон ба вуқӯъ пайвастааст. Дар партави матлаби Паёми Пешвои миллат бояд донист, ки танҳо фарзандони соҳибилму маърифатнок ва бархӯрдор аз касбу ҳунарҳои замони хеш метавонанд Ватанро ободу муҳофизат намоянд, - гуфт Усмоналӣ Нурзода.
Илму дониш дар таълимоти шариат низ мақоми воло дошта, дар ин боб ҳадисҳои зиёд омадаанд, ки бозгӯи фазилату таъсир ва этибору мартабаи донишмандон, косибону ҳунармандон мебошанд: «Фазилати олим бар обид ҳамчун фазилати моҳ бар ситорагон аст». Бо ин мазмун Президенти кишвар муҳтарам Эмомалӣ Раҳмон дар яке аз баромадҳои хеш ёдовар шуда буданд: «Дар хотир бояд дошт, ки Худованди мутаол омӯхтани илмро ҳам ба марди мусулмон ва ҳам ба зани мусулмон фарз гардондааст». Аз ин рӯ, ашхоси дар зиндагӣ соҳибтаҷриба, хоса падару модаронро лозим аст қатъи назар аз ҷинсият ба тарбияи маънавию донишандӯзии фарзандон таваҷҷуҳи хоса зоҳир намоянд. Умед аст дар партави ин гуфтаҳо то истиқболи Ҷашни 30 - солагии Истиқлолияти давлатии Ҷумҳурии Тоҷикистон дар радифи бунёди иншооти таъйиноташон гуногуни ниёзи мардум, муассисаҳои зиёди таълимӣ низ ба таври замонавӣ қомат афрохта, дар чунин боргоҳҳои маърифат фарзандон ба хотири имрӯзу ояндаи дурахшони Ватан боз ҳам ба тадрису тарбияи маънавӣ фарогир мешаванд, - афзуд Усмоналӣ Нурзода.
Дар вазъияти имрӯза бо назардошти раванди ҷаҳонишавӣ, воқеан, тарбияи фарзанд бисёр муҳим ва масъулиятнок аст. Чунки дар зеҳну мафкураи фарзандони миллат таъсиррасонҳо аз ҷумлаи ашхоси ғаразноку кӯтоҳандеш ва, дар умум, ифротгаро кам нест, ки инро таърихи миллат бозгӯ аст. Хушбахтона, моҳияти ватандориро фарзандон бо эҳсоси баланди хештаншиносиву худогоҳӣ ва зиракии сиёсӣ дарк намудаанд. Пас, метавон интизор шуд, ки дар марҳилаи на чандон дури давлатдориамон, насли наврасу ҷавон бо аз худ кардани касбу ҳунарҳои интихобиашон ва бо маънавиёту маърифатнокии волои хеш дар рушди тамоми соҳаҳо ва вусъати корҳои ободониву созандагӣ неруи бузургу тавонбахшашонро равона сохта, парчамбардору муаррифгари чунин як миллати соҳибтаъриху соҳибфарҳанг гардида, аз соҳибистиқлолии Тоҷикистони маҳбуби худ боз ҳам сарафрозӣ менамоянд.
Анвар ҲАФИЗ, «Ҷумҳурият»
Баёни ақида (0) Санаи нашр: 29.01.2020 №: 21-22 Мутолиа карданд: 3212
