ҳуқуқ
"БАҲСИ МАНЗИЛ ДАР НОҲИЯИ РӮДАКӢ Ё ЧАРО СУД ШАРТНОМАИ ХАРИДУФУРӮШРО БАЪДИ 10 СОЛ БЕКОР КАРД?"
Дар Суди Олии Ҷумҳурии Тоҷикистон мақолаи Лашкар Шарифзода таҳти унвони «Баҳси манзил дар ноҳияи Рӯдакӣ ё чаро суд шартномаи харидуфурӯшро баъди 10 сол бекор кард?», ки дар рӯзномаи «Ҷумҳурият», 18 декабри соли 2019, № 240 нашр шудааст, дар якҷоягӣ бо маводи парвандаи оилавӣ мавриди омӯзиш қарор дода шуд.
Дар натиҷа муайян гардид, ки бо ҳалномаи суди ноҳияи Рӯдакӣ аз 7 январи соли 2019 даъвои Маҳмадулло Тағаев, бо ҷавобгарии Бибироҳила Ҳакимова, Нурулло Бафоев, Аҳмад Мирзоев ва идораи нотариалии давлатии ноҳияи Рӯдакӣ дар бораи беэътибор донистани шартномаҳои харидуфурӯши манзили истиқоматӣ басташуда эътироф кардани шартномаи харидуфурӯши хонаи истиқоматӣ ва ба қайди давлатӣ гирифтани аҳд қонеъ карда шудааст.
Бо қарори коллегияи судӣ оид ба парвандаҳои оилавии Суди Олӣ аз 23 майи соли 2019 ҳалномаи мазкур бетағйир, шикояти кассатсионии Б. Ҳакимова беқаноат мононда шудааст.
Далели он ки суд парвандаро бе иштироки Б. Ҳакимова баррасӣ намуда, пас аз 10 сол шартномаи харидуфурӯши хонаҳои истиқоматиро беасос беэътибор дониста, баёноти нодурусти ҷавобгар Нурулло Бафоев, ки гӯё маблағи хонаро аз бародари Б. Ҳакимова – М. Тағаев гирифта буд, ғайриқонунӣ ба назару эътибор гирифтааст, қобили қабул намебошад.
Тавре омӯзиши маводи парванда нишон дод, соҳибмулкони қаблии манзилҳои истиқоматии баҳсӣ Нурулло Бафоев ва Аҳмад Мирзоев дар суди марҳилаи якум ва ҷаласаи коллегияи судӣ баёнот додаанд, ки хонаҳои истиқоматиашонро марҳум М. Тағаев харида, маблағи онҳоро худаш пардохт намудааст. Дар шартномаҳои харидуфурӯш бошад, бо хоҳиши М. Тағаев хоҳараш Б. Ҳакимова ҳамчун харидор имзо намудааст.
Ҳамзамон, аз протоколи маҷлиси судӣ бармеояд, ки Б. Ҳакимова ва намояндааш М. Муҳаммадинова дар маҷлиси судӣ иштирок намуда, баёнот додаанд. Азбаски парвандаи дар боло зикршуда дар доираи талаботи қонунҳои моддӣ ва мурофиавӣ ҳалли худро ёфтааст, барои бекор кардани санадҳои судӣ асос дарёфт карда нашуд.
С. РАҲМОНЗОДА,
муовини раиси Суди Олӣ
Баёни ақида (0) Санаи нашр: 05.02.2020 №: 27 Мутолиа карданд: 1175
